Krimeako egoera zuzentzea eskatu dio Obamak Errusiari

Barack Obama AEBko presidenteak Krimeako egoera zuzentzea eskatu dio asteazken honetan Errusiari; hori egin ezean, ondorioak egongo direla ohartarazi du Obamak. AEBko presidenteak Arseni Jatseniuk Ukrainako behin-behineko lehen ministroa hartu du Etxe Zurian, babesa agertzeko; bilera horren ondoren, Kievek agindu du ez duela amore emango Errusiaren aurrean.

"Errusiako Gobernuak egungo bidetik jarraitzen badu, ordaindu egingo du, nazioarteko zuzenbidearen legeak eta Ukrainako legeak urratzegatik", ohartarazi du Obamak. Horren harian, AEBko presidenteak berretsi egin du ez dutela erreferendumaren emaitza onartuko, Ukrainako legeak urratzen dituelako.

Jatseniuk Ukrainako lehen ministroak, bestalde, Errusiak Krimean egindako esku-hartze militarra "onartezina" dela azpimarratu du. Halaber, AEBren babesa eskertu du, eta Ukrainako herritarrak beren askatasunaren, independentziaren eta subiranotasunaren alde borrokan jarraituko dutela adierazi du.

Christine Lagarde Nazioarteko Diru Funtseko zuzendariarekin ere bilduko da Jatseniuk asteazken honetan, eta, ostegunean, Nazio Batuen Erakundeko Segurtasun Kontseiluan agerraldia egingo du, Ukrainako egoera hizpide.