Istilu larriak Kieven, manifestarien eta polizien artean

Istilu larriak jaso dira astelehen honetan Kieveko (Ukraina) Independentzia plazan, Viktor Janukovitx presidenteari dimititzeko eskatzen dioten manifestarien eta polizien artean.

Manifestariek molotov koktelak jaurti dizkiete istiluen aurkako agenteei, eta horiek soinu-bonbekin, granadekin eta gas negar-eragilearekin erantzun dute, Espreso telebista kateak azaldu duenez.

Plazan ur-isuria izan da, eta, ondorioz, izotz ugari sortu da zoruan.

Manifestariek barrikadak egin dituzte, eta, horietatik, agenteei eraso egiten aritu dira. Milaka pertsona bildu dira bertan, Gobernuaren aurka protesta egiten.

Protestak abenduan hasi ziren, Exekutiboak Europar Batasunetik urrundu eta lankidetza akordioak Errusiarekin sinatzearen alde egin zuenean.