Obamak babesa agertu dio 'Venezuelako herriari' Chavez hil ostean

Barack Obama AEBetako presidenteak babesa helarazi dio "Venezuelako herriari" eta "harreman eraikitzailea garatzeko interesa" agertu dio Gobernuari Hugo Chavez presidentearen heriotzaren ostean.

"Venezuelaren historiaren beste kapitulu bat hasiko da gaur, eta AEBek konprometituta jarraitzen dute printzipio demokratikoetan, Zuzenbidezko Estatuan eta giza-eskubideen errespetuan oinarritutako politikekin", adierazi du Obamak prentsa-agiri labur batean.

Horren aurretik, AEBetako Gobernuko bozeramaile ofizialek ukatu egin dute Hugo Chavez Venezuelako presidentearen osasunaren kontrako erasorik egin dutenik.

"AEBek Chavez presidentearen gaixotasunean eragina izan dezaketela esatea erokeria da, eta erabat gezurtatzen dugu", adierazi du Patrick Ventrell Estatu Departamentuko bozeramaileak beste agiri batean.