Normaltasunera buelta, itzalaldi masiboaren ostean

Itzalaldiaren hurrengo egunean, gaur goizean, argindarraren eta garraio-sarearen hornidura ia osoa berrezarri da. Red Electricak jakinarazi du "sistema elektrikoa ohiko legez, egonkor eta egoki" dabilela lanean. Goizeko lehen orduan, Eusko Jaurlaritzak jakinarazi du hornidura % 100ekoa dela. 

Modu berean, Red Electricak baztertu egin du itzalaldia bere instalazioetako zibersegurtasun ezuste batek eragin izana.

Bingen Zupiria sailburuak deia egin du "informazio zehatzetara" jotzeko, "albiste itxurako afirmazioak" ikusi dituztelako, "oraindik zer gertatu den ez dakigun honetan". Halaber, normaltasunera itzultzeko egindako ahalegina nabarmendu du.

Maria Chivitek adierazi du 2. mailako larrialdi mailari eutsiko diotela, baina 12:00etan berriro bilduko direla, eta "asmoa deseskalatzen joatea" dela. "Lasaitasun mezua helarazi nahi dut, normaltasunera itzultzen ari gara", azpimarratu du Nafarroako presidenteak, eta "ziurgabetasun une batean" egindako lana eskertu du.

LABIa 13:00etan bilduko da egoera aztertzeko. Bileran Eusko Jaurlaritzaren sailburuak, EAEko hiru ahaldun nagusiak, Espainiako Gobernuaren ordezkaria eta udaletako ordezkariak ere izango dira, atzoko moduan.

Normaltasuna gertu da Abandoko geltokian, eta lehen trenak irteten hasiak dira: Bilbo eta Madril arteko 07:00etako trena ez da zegokion orduan atera, ordubete berandu baizik. Urduñarako lehen aldirikoa 08:05ean irten da. Itzalaldi masiboaren eraginez treneko bidaiariek Renferen salmenta-kanaletan txartelak itzultzea eta debalde aldatzea eska dezakete.

Metro Bilbaok berrekin dio zerbitzuari, ohiko maiztasunetan gorabeherarik izan gabe (jakinarazi dute, halere, balitekeela sareko igogailu batzuk zerbitzu barik egotea). Renfe aldirietan bestelakoa da egoera: aldiriak ez daude martxan. Bingen Zupiria Segurtasun sailburuak atzo aurreratu zuenez, trenbideko garraioa erabat berrezartzen zailena izango da.

¿ ¿ Metro zerbitzua normaltasunez ari da. Sareko igogailu batzuk zerbitzuz kanpo egon daitezke. Barkatu eragozpenak

¿ ¿ Servicio de metro funcionando con normalidad. Algunos de los ascensores de la red pueden no estar operativos. Disculpen las molestias.

— metro bilbao (@metrobilbaoeus) April 29, 2025

EuskoTrenek zerbitzu guztiak berreskuratu ditu, gauean E1 lineako Ermua eta Durango arteko zatia berrezarri baitu.

EuskoTrenek jakinarazi duenez, gauez egindako lanei esker, Ermua eta Durango arteko trenbide-garraioa berrezarri dute. Izan ere, Ermua eta Durango arteko tartea atzo gauean martxan jarri gabe zegoen, eta, beraz, dagoeneko erabat martxan daude Bilboko eta Gasteizko tranbiak eta Larreinetako funikularra.

0:35

Garraio publikoa ia bere onera etorri da, itzalaldiaren ondoren

Segurtasun-arduradunak mezu argia utzi zuen ikastetxeetako egoerari buruz; izan ere, gaur normaltasunez ekin zaio ohiko jarduerari, leku seguruenak direla frogatu ondoren.

Atzo 22:00etarako, Euskadik argindarraren % 96 berreskuratuta zeukan. Lehendakariak "lasaitasuna, ardura eta zuhurtzia" eskatu zituen. Nafarroan, etxeen %80etan dute argindarra, ordu bereko datuen arabera.

Euskadin, Arrigorriaga, Zamudio eta Eibarren ez zuten argirik izan gauera arte, baina pixkanaka ohiko martxa berreskuratzen ari gara, inoiz espero gabeko egun baten ondoren.

Osakidetza

Itzalaldi masiboaren ondoren, Osakidetzako zerbitzuak normaltasunez funtzionatzen ari dira, eta programatutako ebakuntzek eta kontsultek planifikatu bezala jarraitzen dute, Osasun Saileko iturriek baieztatu dutenez.

Itzalaldiak ez zien eragin EAEko ospitale handiei, martxan jarraitu baitzuten, gailu elektrogenoak baitituzte beren jarduera bermatzeko. Zentro txikietan 36 edo 48 orduko autonomia-zerbitzua zuten, eta autonomia hori handitu behar izanez gero, gasolioz hornitzeko aukera zeukaten aurreikusita. Hala ere, zenbait zentrotan, premiazkoak ez ziren esku-hartzeak birprogramatu egin behar izan ziren arratsaldean.

Jarduera industriala

Euskal industriari dagokionez, kaltetutako lantegiak lanean ari dira energia-etenduraren ondoren ohiko erritmoa berreskuratzeko. Sestaoko eta Olaberria Bergarako altzairutegiak lanean hasi dira jada, eta martxan daude itzalaldiaren ostean, ArcelorMittalek Euskadin dituen gainerako lantegiak bezala.

Mercedes Gasteizen, atzo Araban jaieguna zenez, ez zen produkziorik erregistratu, eta, beraz, ez zen zuzeneko eraginik izan. Gaur, hasieran arazoak izan dituzten arren, lantegiak ekoizpena martxan jartzea lortu du. Michelini dagokionez, normaltasunez ekin zaio jarduerari ia eremu guztietan, kontsumo handiko lineetako gorabehera batzuk izan ezik, horiexek izan baitziren atzoko itzalaldiak gehien kaltetu zituenak.

Aceros Olarran, argindarra bart berrezarri dute, eta ekoizpena modu seguruan nola jarri martxan aztertzen ari dira. Bestalde, Nafarroako Volkswagenek normaltasunez ekin dio goizeko txandari, eta produkzio-prozesua martxan jartzeko lanean ari dira.

Egoera Espainiako Estatuan

Sare Elektrikoaren kudeatzaile energetikoak X sare sozialean jakinarazi duenez, garraio-sareko azpiestazio-parkeen % 100 energizatuta daude dagoeneko.

Herrialdea pixkanaka suspertzen ari da "erabat ezohikoa" izan den egoera batetik. Gertakariak argindarraren itzalaldi orokorra, komunikazio mugikorren deskonexioa eta merkataritzan, industrian eta, batez ere, garraio-sarean gorabeherak eragin ditu.

Itzalaldiaren ondorioz, konpainia guztietako tren-zerbitzu guztiak bertan behera geratu ziren, eta 116 tren eta 30.000 erabiltzaile kaltetu ziren; aldiriko trenen zerbitzuak eta hiri nagusietako metroak, berriz, ezin mugitu gelditu ziren.

Gainera, tren batzuetako bidaiariak erreskatatu behar izan dituzte, eta geltoki asko zabalik egon dira goizalde osoan, bidaiariei babesa emateko.

"Normaltasuna", Portugalen

Portugalgo Gobernuak ziurtatu duenez, "herrialdea normaltasunera itzuli da" eta erabiltzaile guztiek argia dute berriro, ur-hornidura ia herrialde osoan dabil eta aireportuak martxan daude itzalaldiaren ostean.

Osasun-zerbitzuei dagokienez, "egoera egonkortuta dago", tren-zerbitzuak "martxan" daude eta ez da "segurtasun eta babes zibileko arazorik" izan, Portugalgo Gobernuak X sare sozialeko kontuan adierazi duenez.

Erreklamazioak

Kontsumobide Kontsumoko Euskal Institutuak gogorarazi duenez, ezinbesteko kasu baten aurrean —atzoko itzalaldia, adibidez—, ez dago kalte-ordainik jasotzeko eskubiderik hornidura elektrikoa eten dela eta, ezta bidaietan eragozpenak izateagatik kalte-ordainik jasotzeko ere.