Gizartea
INDARKERIA MATXISTA
Gizon bat atxilotu dute Ourensen, emaztea hiltzea leporatuta
AGENTZIAK | EITB MEDIA
Biktima, 76 urteko emakumea, arma zuriz hil dute. 72 urteko senarra atxilotu dute, epailearen esku geratzeko zain.
72 urteko gizon bat atxilotu dute igande honetan O Bolon (Ourense), 76 urteko emaztea hil omen duelako. Lehen informazioen arabera, ustezko hiltzaileak arma zuriz eraso egin dio bikotekideari As Ermidas parrokian.
18:00 aldera atxilotu dute ustezko erasotzailea eta A Ruako (Ourense) Guardia Zibilaren egoitzara eraman dute. Bertan atxilotuta dago, epailearen esku geratzeko zain.
O Boloko Udalak ezohiko osoko bilkura deitu du asteleheneko 14:00etarako eta hiru dolu-egun ezarri dituzte.
Alkateak azaldu duenez, senar-emazteek emigratu zuten, eta, biek erretiroa hartu ondoren, As Hermidasera joan ziren bizitzera, 20 pertsona inguru bizi diren herri batera.
Udalak ez zuen bikotearen baitako indarkeria abisurik jaso ezta aurretiazko jakinarazpenik ere.
Emakume honena hilketa matxista dela baieztatuz gero, urtea hasi zenetik gizonezko bikotekideek edota bikotekide-ohiek Espainian hiltzen duten zazpigarren emakumea litzateke, eta eraildako 1.302. emakumea, 2003an feminizidioei buruzko estatistikak egiten hasi zirenetik.
