Gizartea
Baskonia-Makabi
Makabi Tel Aviv Gasteizera datorrela eta, protestak deitu dituzte Buesa Arena barruan eta kanpoan
EITB Media
Palestinarekin Elkartasuna taldeak partida bertan behera uzteko eskatu du, eta eskaerarekin bat egin dute Indar Baskoniak, EH Bilduk eta Ezker Anitza-IUk. Manifestazioa deitu dute (18:30, Iparralde gizarte etxea) eta zaleei partidaren lehen laurdenean Buesa Arenara ez sartzeko galdegin diete.
-
Baskoniaren zaleak, Palestinaren alde, Maccabiren aurkoa aurreko partida batean. Argazkia: EFE
Baskoniak Euroligako partida du gaur, 20:30ean, Buesa Arenan, Tel Aviveko Makabiren kontra, eta horren atarian, Israelgo taldearen eta partidaren beraren kontrako protestak antolatu dituzte, pabiloiaren kanpoaldean zein barruan.
"Israelen aurpegi garbiketari ez" lelopean, Palestinarekin Elkartasuna plataformak manifestazioa deitu du gaur arratsalderako. Iparralde gizarte etxetik abiatuko dute martxa, 18:30ean, eta 20:00etan bukatuko da, Zurbanoko atean, Buesa Arena parean. 21:00ak arte protestan arituko dira bertan. Horren harira, Gasteizko Udaltzaingoak trafiko dispositibo berezia jarriko du martxan, "Buesa Arena pabiloira joateko desplazamenduak errazteko".
Kolektiboaren arabera, "partida honek Israel gerrarekin eta genozidioarekin ez lotzeko helburua du. Israelek kirol ikuskizunak erabiltzen ditu bere aurpegia zuritzeko, eta Palestinako herriaren kontrako krimenak estali eta estatu koloniala dela normalizatzeko". Era berean, EAEko erakundeak —Eusko Jaurlaritza, Arabako Foru Aldundia eta Gasteizko Udala— eta Baskonia kluba "Israelen konplize" direla salatu du Palestinarekin Elkartasunak, "ez baitute ezertxo ere egin partida geldiarazteko".
Ildo beretik, Indar Baskonia animazio taldeak "erabat errefusatu" du partida, eta Makabi Euroligatik kanporatu beharko luketela erantsi du. "Hitzorduaren helburua Israel normalizatzea da, hamarkadatan zehar herri palestinarra okupatu eta sarraskitu duen estatu terrorista", kritikatu du.
Hain justu, Palestinarekin Elkartasuna taldeak egindako eskaerarekin bat egin du zaleen elkarteak, eta jarraitzaileei "lehen laurdenean pabiloira ez sartzeko eskatu die, eta behin barruan, harmailak bandera palestinarrekin betetzeko eta Palestinaren aldeko oihuak egiteko galdegin die".
MACCABI KANPORA!
— Indar Baskonia 1986 (@indarbaskonia86) February 5, 2025
18:30 Manifestazioa Iparralde Gizarte Etxetik.
Partiduaren lehen laurdenean utz dezagun pabiloia hutsik!
¿¿Erakutsi zure Palestinar bandera partiduan zehar! pic.twitter.com/0tnwI6eDDI
EH Bildu, Ezker Anitza-IU eta Podemos alderdiak ere partidaren kontra azaldu dira.
