Arakilgo Udalak esan du ez duela baimenik eman AHTaren zundaketak egiteko, eta gelditzeko agindu du

Arakilgo alkateak adierazi duenez, Udalak ez du baimenik eman Abiadura Handiko Trenaren zundaketak egiteko, eta ostiralean "gelditzeko agindua" eman zuen, Izurdiagan lan horiek egiten ari zirela jakin zuenean. Astelehenean zundaketak egiten jarraitzen badute, Udalak Foruzaingoari deituko dio lanak geldiarazteko, Stop AHT Zundaketak plataformatik adierazi dutenez.

Atzo batzarra egin zuten Izurdiagan 40 bat lagunek, plataforma horrek deituta. Bertan, jakinarazi zuten ostegunean enpresa bateko langileek agertu zirela, "makina zulatzaile batekin, eta zulo bat egin zutela trenbidetik oso gertu dagoen errepidearen bazterbidean. Bazkalorduan makina kamioi batean eraman zuten, eta arratsaldean berriz ere itzuli ziren makinarekin, eta lanean aritu ziren iluntzera arte. Segurtasun pribatuko bi agentek eskoltatuta egon ziren".

"Ostiralean zehar, langileek eta makinak ez zuten bizi-seinalerik eman, baina iragarri zuten datorren astelehen eta asteartean berriro ekingo dietela lanei, eta ondoren Urrizolan jarraituko dutela zundaketekin. Langileek esan zuten Nafarroako Gobernuaren baimenarekin ari zirela lanean", adierazi du ATHaren aurkako kolektiboak prentsa-ohar baten bidez.

Hori dela eta, taldeak bi protesta deitu ditu astelehenerako, bata 09:00etan eta bestea 15:00etan, Izurdiagako futbol-zelaian.

Lehen zundaketa Sakanan!Ostegunean hasi zuten Izurdiagako zundaketa, astelehenean jarraitu nahi dute. Etorri zundaketa gelditzera!
El sondeo que comenzaron el jueves en Izurdiaga lo quieren continuar el lunes. Acude a paralizar los sondeos
STOP AHT ZUNDAKETAK! pic.twitter.com/w6FKeJFkWj

— AHT Gelditu! (@ahtgelditu) January 18, 2025