Bilboko epaile dekanoak ukatu egin du auzitegietan euskara erasotzen ari direnik

Aner Uriarte Bilboko epaile dekanoak ukatu egin du auzitegietan euskararen aurkako erasoak egiten dituztenik, eta esan du epaileek "oso jarrera irekia" dutela euskararekiko. Gainera, pare bat oztopo gainditzen dituztenean, 2025ean epaiketa batzuk "euskara hutsean" egin ahal izango dituztela jakinarazi du.

Bilboko epaileen ordezkariak horixe erantzun du Gorenak lan eskaintza publiko bat euskararen eskakizunagatik errepikatu egin behar dela berretsi ostean.

Radio Euskadin egindako elkarrizketa batean adierazi duenez, "esan izan da epaileak antieuskara garela edo euskararen aurka egiten dugula. Hori ez da egia, eta ezin da izan. Ezinezkoa da hori gertatzea, zeren ez gara antolatzen, eta ez da euskararen aurkako erabakiak hartu behar direla dioen agindurik. Ezinezkoa da gertatzea, beste inolako kausaren aurka ezin den moduan".

Bilboko epaile dekanoaren arabera, "interes desberdinak jartzen dira jokoan: euskara babesteko eskubidea eta lanerako eskubidea". "Kasu batzuetan, aipatu ebazpenean bezala, euskara babesteko jartzen diren baldintzak gehiegizkoak dira postu jakin horretarako, eta baldintza hori deuseztatzen da norbaitek aldarrikatu duen lanerako eskubidearen mesedetan", azaldu du.

Aner Uriarterentzat horrelako ebazpenak "normaltasunean" kokatzen dira. "Ez dut inolako erasorik ikusten euskararen aurka, ezta urrik ere", berretsi du.

Epaileak gogorarazi du euskara hizkuntza ofiziala dela EAEn, eta "ahal den neurrian, justizia administrazioarekin euskaraz harremanetan jarri nahi duenari aukera arazorik gabe ematen saiatzen" direla.

Bestalde, Uriartek EAEko Justizia Auzitegi Nagusiak epaiketak osorik euskaraz egiteko abian jarriko duen proiektu pilotoa izan du hizpide, eta jakinarazi du bederatzi magistratu daudela "epaiketak euskaraz, itzultzailerik gabe, egiteko prest".

Proiektuak "Bizkaiko Abokatutzaren, ELAren eta beste sindikatu batzuen" laguntza jaso du, eta "Estatuaren Abokatutza ideiaren oso alde dago".

Dena den, aitortu du "bi oztopo" gainditu behar dituztela. Izan ere, "ezin da auzi bat euskaraz egin nahi duen epaile batengana bideratu", prozedura bestelakoa delako.

Horrez gain, auzian parte hartzen duten guztiek jakin behar dute euskaraz, "bestela arazoak sor litezke eta".

Bi oztopo horiek gaindituz gero, "ziurrenik aurten bertan egin ahal izango dira epaiketak euskara hutsean".

Gainera, azpimarratu du magistratu batzuk euskalduntzen jarraitzen dutela, eta epaileen belaunaldi berriek "gehiago menperatzen" dutela euskara. "Epe ertain-luzean egoerak hobera egingo duela aurrera dezaket", nabarmendu du.