Gizartea
TRAFIKOA
Gizon bat hil da auto batek harrapatuta A-63 autobidean, Biriatu parean
EITB Media
Harrapaketa gauerdian jazo da, argitu gabeko arrazoiak tarteko, gizonezkoa autobidean oinez ibiltzen ari zela. Autoan zihoan pertsonetako bat zaurituta eraman dute Baionako Ospitalera. Jendarmeriak ikerketa zabaldu du.
Gizon bat hil da gauerdian auto batek harrapatuta A-63an, Biriatu parean (Lapurdi), Ipar Euskal Herriko hedabideek zabaldu dutenez.
Harrapaketa 00:00ak jota jazo da, 50 urteko biktima autobidetik oinez ari zenean. Auto batek bete-betean harrapatu du eta bertan zendu da gizona. Hala, bertaratutako osasun zerbitzuek heriotza baino ezin izan dute baieztatu.
Gainera, autoan zihoan bidaiarietako bat ere zaurituta eraman dute Baionako Ospitalera.
Jendarmeriak ikerketa zabaldu du gertatutakoa argitzeko.
