Gizartea
UHOLDE ARRISKUA
Ibaien emariek gora egiten jarraitzen dute Araban eta Nafarroan, eta agintariek zaintza aktibatu dute
AGENTZIAK | EITB MEDIA
Zadorra, Ega, Arga eta Irati ibaien bilakaera zaintzen ari dira larrialdi zerbitzuak. Nafarroako Gobernuak Larrialdi Planaren 0 fasea aktibatu du, Iruñeko arroan eta erkidegoaren iparraldean uholdeak izateko arriskua baitago. Nafarroako hainbat errepidetan arazoak izan dira gauean.
Euriagatik alerta laranja ezarri dute EAEn astelehen eguerdira arte, eta abisu horia, berriz, Nafarroan. Azken orduetako euriteek asko handitu dute zenbait ibairen emaria, eta, horren aurrean, agintariek zaintza areagotu dute. Araban, Zadorra ari dira zorrotz zaintzen, eta Nafarroan, Ega, Arga eta Irati ibaien emaria.
Ebroko Ur Konfederazioak (CHE) ez du baztertzen aparteko ur-goraldia izatea eta kalteak eragitea. Igande arratsalderako eta datorren goizalderako aurreikusten ditu erakundeak emari maximoak ibai horien goialdeetan, eta erdiko zein beheko guneetan, berriz, bihar eguerditik astearteko goizaldera bitartean.
Gainera, gauean Ebroren ardatzera iritsiko da pixkanaka ura, eta bertan emaria asko handitzea aurreikusten da.
Ebroko Konfederazio Hidrografikoak aurreikusi duenez, Ebroren emaria, Castejon eta Tutera artean, segundoko 1.400-1.800 metro kubikokoa izan daiteke asteartean (gaur 14:00etan segundoko 200 metro kubikokoa zen).
Iruñea inguruan arratsaldean ur emaria asko hazi dela eta, Udalak uholdeetarako larrialdi-planaren 1. maila aktibatu du, eta ibilgailuak urpean gera daitezkeen eremuetatik erretiratzeko eskatu du Corralillos, Runa parkea, Igeriketa eta Magdalena inguruetan.
Arazoak Nafarroako zenbait errepidetan
Ibaien emaria handitzeak arazoak eragin ditu Nafarroako hainbat errepidetan, besteak beste, A-21 Pirinioetako Autobian. 12. kilometroan moztu egin behar izan dute, ur-pilaketaren ondorioz.
Nafarroako Gobernuak emandako errepideei buruzko informazioaren arabera, autobia horretan moztuta dago Elorzera sartzeko azpiko pasabidea, bi noranzkoetan.
Halaber, uholdeak direla eta, itxita daude NA-30 errepidea, Iruñean, Landabengo industrialderako sarbidean; NA-2316 errepidea, Zuluetan; NA-7010 errepidea, Astrain-Irurtzunen, 8. kilometroan, eta NA-2410 errepidea, Barrankan, 12,200 kilometroan.
Elurra dela eta, zirkulaziorako itxita jarraitzen dute eta kateak behar dira Pirinioetako hainbat errepideetan, baita Aralarko San Migelerako sarbidean ere.
Nafarroan, Larrialdi Planaren 0 fasea aktibatu dute
Nafarroako Gobernuak, prebentzioz, Larrialdi Plana aktibatu du Foru Erkidegoan, 0 egoeran, uholdeen arriskuari aurre egiteko. Datu meteorologikoek eta hidrologikoek ondasunei eta pertsonei kalteak eragin diezaieketen uholdeak izan daitezkeela aurreikusten dutenean aktibatzen da fase hori.
Larrialdiei Aurre Egiteko eta Babes Zibileko Zerbitzuko zuzendariak 18:00etan hartu du neurria, Larrialdiei Aurre Egiteko Aholku Batzorde Teknikoaren bileran. Bertan, Amparo Lopez Barneko, Funtzio Publikoko eta Justiziako kontseilariak hartu du parte.
Kontseilaritza Iruñealdeko zein Nafarroa iparraldeko udalekin jarri da harremanetan, planaren aktibazioaren berri emateko eta herritarrei kontuz ibiltzeko eskatzeko.
Burlatako, Ezkabarteko, Uharteko, Iruñeko eta Atarrabiako udal-ordezkariekin hitz egin dute telefonoz Iruñerrian, eta iparraldean, berriz, Bertizarana, Elizondo, Etxalar, Doneztebe, Sunbilla, Ultzama eta Berakoekin, hor baitago uholde arrisku handiena.
Gaueko 22:00ak pasata, Arga ibaia alerta aurreko egoeran zegoen Larraun-Irurtzunen (lehenagoko alerta egoerak hobera egin du), Iruñean, Arakil-Etxarrenen, Arazurin eta Etxaurin.
Nafarroako Gobernuak herritarrei aholkatu die beharrezko prebentzio-neurriak hartzeko, alferrikako joan-etorriak saihesteko eta arriskua dagoen tokietara ez hurbiltzeko. Horrez gain, ibaietara ez hurbiltzeko eta aire zabaleko kirol-jarduerak ez egiteko ere gomendatu dute.
Prebentziozko hustuketa egin dute Añarbeko urtegian
Euskal Autonomia Erkidegoan, berriz, Donostialdea hornitzen duen Añarbeko presak prebentziozko hustuketa egin du jasotako prezipitazio bolumena ikusita, eta bost puntu baino gehiago murriztu du urtegiaren maila, % 78,7raino.
Ohar batean, Añarbeko Urak sozietate publikoak jakinarazi du Añarbeko arroan prezipitazio handiak izan direla ostiraletik.
Zehazki, 111,2 l/m2 erregistratu dira Añarbeko presaren euri-neurgailuan (44 l/m2 ostiralean, 26,3 l/m2 larunbatean eta 40,9 l/m2 igande honetako lehen orduetan) eta 145,6 l/m2 Eskas-Artikutzan (78,3 l/m2 ostiralean, 43,6 l/m2 larunbatean eta 23,7 l/m2 igandean).
Hori dela eta, larunbateko 17:15etik aurrera, 23 m3/s-ko hustuketa prebentiboa egin dute urtegiaren maila % 84,3tik % 78,7ra jaisteko. 18:00etan amaitu da presaren prebentziozko hustuketa, ur emari gehiago Urumeara iristea eragozteko.
Gipuzkoako gainerako ibaiak ere oso hazita doaz, eta Urola ibaia da azken orduotan zorrotzen zaintzen ari direna, gainezka egiteko arriskua dagoelako.
