Gizartea
UNIBERTSITATEA
Joxerramon Bengoetxea EHUko errektore berria izango da, hauteskundeetan botoen % 63 eta garaipena eskuratuta
EITB MEDIA
Eva Ferreirak botoen % 36,3 eskuratu du, eta Joxerramon Bengoetxeak, hauteskundeetako irabazleak, bozen % 63,6. Parte-hartzeak gora egin du unibertsitateko sektore guztietan, eta hautestontzietara deitutako 50.590 pertsonatik 11.081ek eman dute botoa.
Joxerramon Bengoetxea izango da Euskal Herriko Unibertsitateko (EHU) errektore berria, gaur hauteskundeak irabazi ditu eta. Eva Ferreirak botoen % 36,3 eskuratu du, eta Bengoetxeak, hauteskundeetako irabazleak, bozen % 63,6.
Parte-hartzeak gora egin du unibertsitateko sektore guztietan, eta hautestontzietara deitutako 50.590 pertsonatik 11.081ek eman dute botoa, horietatik 2.870ek Ferreirari eta 7.599k Bengoetxeari. 530 boto zuri eta 82 baliogabe izan dira.
Unibertsitatea hurrengo sei urteetan gidatuko duen errektorea izendatzeko hauteskundeak izan dira EHUn. Unibertsitate Sistemaren Lege Organikoa aplikatuz (44.3 artikulua), agintaldiak, lehen aldiz, sei urteko iraupena izango du. Epe hori luzaezina izango da eta, agintaldia, berriztaezina.
Errektore hautetsiak besarkatu egin du Ferreira, eta "hunkituta" eta "ilusioz" agertu da, eta eskerrak eman dizkio aurkariari kanpainan zehar bere programak kontrastatzeko aukera emateagatik.
Hauteskundeetan izandako parte-hartze handia azpimarratu du Joxerra Bengoetxeak bere hitzaldian: "Unibertsitateak irabazi du".
Bestalde, Eva Ferreirak zoriondu egin du Bengoetxea, eta "eskua luzatu" dio Errektoretzako trantsizioa errazteko, eta onena opa dio etorkizunari begira.
Era berean, Ferreirak jasotako babesa eskertu nahi izan du. Porrota onartu eta eskua luzatu dio Bengoetxeari. "Kanpaina bizia izan da eta gaur unibertsitateko komunitateak hitz egin du eta Bengoetxea irakaslea hurrengo errektorea izatea erabaki du", gaineratu du Ferreirak.
16 urtean lehen aldiz, bi hautagai —Eva Ferreira egungo errektorea eta Joxerramon Bengoetxea Zuzenbidearen Filosofiaren katedraduna— izan dira lehian. Hauteskunde kanpaina zalapartatsua izan da oso, eta dimisio bat ere izan da tartean. Guillermo Quindos Ferreiraren 'bigarrenak' kargua utzi behar izan zuen, sare sozialetan Bengoetxearen kontra botatako irainak zirela eta.
Bi hautagaiek goizean eman dute botoa euren fakultateetan: Ferreirak, Bilbon; eta Bengoetxeak, Donostian.
50.590 pertsona zeuden hautetsontzietara deituta. Horien artean zeuden lotura iraunkorra duten 2.326 irakasle doktore; irakasle ez-doktoreen eta lotura iraunkorrik ez duten 1.649 irakasle eta ikertzaile doktore; 1.801 gainerako irakasle eta ikertzaile; 42.837 ikasle, eta kudeaketa eta administrazio eta zerbitzuetako 1.977 langile tekniko.
Hauteskunde-mahaiak 09:00etan zabaldu dituzte, eta 18:00etan itxi. Guztira, 99 hauteskunde-mahai osatu dira eta 1.000 hautetsontzi baino gehiago izan dituzte. 242.000 boto-paper eta 65.000 gutun-azal inprimatu dira. Horiek guztiak birziklatzeko jasoko dira.
Bengoetxea errektore izango da urtarrilean izendatzen dutenetik, eta Europako Justizia Auzitegiko letradua eta Eusko Jaurlaritzako Lan eta Gizarte Segurantza sailburuordea izan zen 1998tik 2001era.
Prestakuntza eta Enplegua Sustatzeko Sozietate Publikoaren zuzendaritza-kontseiluko presidente eta Hobetuzen presidente ere izan da, eta Eusko Alkartasunaren hautagaia izan zen 2004ko Europako Parlamenturako hauteskundeetan.
Bengoetxearen lantaldea hamar emakumek eta sei gizonek osatuko dute: Leire Garmendia izango da idazkari nagusi eta Estitxu Garai (Bizkaia), Ixone Fernandez de Labastida (Araba) eta Juana Goizueta (Gipuzkoa), errektoreorde.
EHUko Ikasle Kontseiluak ohar baten bidez zoriondu du Bengoetxea, eta pozik agertu da ikasleak hauteskundeetan izan duten parte-hartze "historikoa" bere ahotsen "indarraren eta garrantziaren testigantza" baita.
"Ikasleak mobilizatzen direnean, aldea egin dezakete eta amesten dugun unibertsitaterako bidea zehaztu", nabarmendu du Ikasle Kontseiluak.
