Gizartea
Emisio Gutxiko Eremua
Emisio Gutxiko Eremua onartu dute Donostian; erdiguneko trafikoari ezarritako muga berriak, hemen
EITB MEDIA
Abenduan hasiko da, "proba moduan", eta 2025aren hasieran aplikatuko da. Urtarrilean eta otsailean arau-hausteen berri emango dute, eta martxora arte ez dute isunik jarriko.
Donostiako Udaleko osoko bilkurak azaroan onartuko du behin betiko Emisio Gutxiko Eremua (EGE) arautuko duen ordenantza; abenduan hasiko da "proba" fasea, eta 2025aren hasieran aplikatuko da; hala ere, urtarrilean eta otsailean arau-hausteen berri emango dute soilik, eta martxora arte ez dute isunik jarriko.
Donostiako Udalak Emisio Gutxiko Eremuari buruzko herritarren arretarako bulego bat ireki du aste honetan, zalantzak argitzeko. Arroka plazako 5. zenbakian dago, astelehenetik ostiralera 9:00etatik 14:00etara egongo da zabalik, eta asteazkenean arratsaldez ere egongo da zabalik, 16:00etatik 18:00etara.
Berrikuntza gisa, Udalak 10 kamera finko jarriko ditu emisio gutxiko eremura sartzen diren ibilgailuak kontrolatzeko. Halaber, baimenik gabe sartzeagatik 200 euroko isunak ezartzea aurreikusten da.
Emisio gutxiko eremua Boulevarretik Araba parkeraino hedatuko da, eta kaia eta Arbaizeneko ingurua ere hartuko ditu.
Hasierako fasean, hots, ordenantza indarrean sartu eta lehen 36 hilabeteetan, hauek dira inolako izapiderik gabe emisio gutxiko eremuan sartu ahalko diren ibilgailuak:
- Bizikletak, mugikortasun pertsonaleko ibilgailuak
- 0/ECO/C eta B bereizgarria duten ibilgailu motordunak eta ziklomotorrak eta DGTk historikotzat jotako ibilgailuak
- Emisio gutxiko eremuan erroldatuta dauden egoiliarren ibilgailuak
- MM bereizgarria duten mugikortasun urriko pertsonen ibilgailuak
- TAO txartela duten eta jarduera ekonomikoak egiteko erabiltzen diren ibilgailuak, taxiak eta VTCak
Era berean, eskaera eginda, beti sartu ahal izango dira: mugikortasun urriko Europako txartela duten pertsonak garraiatzeko ibilgailuak eta interes orokorreko zerbitzuak emateko ibilgailuak (posta, garraioa, polizia, osasuna...). Horrez gain, garajeak dituzten titularren ibilgailuak, eremu barruan dauden autoeskolen ibilgailuak eta ibilgailuak konpontzeko tailerretara doazenak ere sartu ahal izango dira.
Erdigunera sartzeko eskaerak Donostiako Udalaren webgunearen bidez zein aurrez aurre kudeatu ahal izango dira, Herritarren Arretarako ohiko kanalen bidez.
Prozesu mailakatu hori hiru urteko bi fasetan egingo da, eta murrizketa desberdinak izango ditu: Lehenengo fasea 2024ko abendutik 2027ra izango da, eta bigarrena 2028tik 2030era.
10 kamera finko
10 kamera finkok kontrolatuko dituzte emisio gutxiko eremuko sarrera-irteerak. Ibilgailuen matrikulak irakurriko dituzte kamerek, sartu ahal diren egiaztatzeko. Trafikoa zaintzeaz arduratzen diren agenteek ere izango dute ibilgailuen matrikulak identifikatzeko modua.
Kamera horiek leku hauetan jarriko dira: Zurriolako zubian, Santa Katalina zubian, Gernikako Arbola eta San Martin arteko bidegurutzean, Gernikako Arbola eta Valentin Olano arteko bidegurutzean, Arabako Parkea eta Easo arteko bidegurutzean, Autonomia kaleko biribilgunean, San Roke eta Belizalde arteko bidegurutzean, San Roke eta Beloka arteko bidegurutzean, Aldapeta eta Fedearen Pasealekuaren arteko bidegurutzean, eta Mirakontxa pasealekuan (Almudena etxea).
Baimenik gabe emisio gutxiko eremuan sartzen diren ibilgailuek 200 euroko isuna jasoko dute, eta hortik gorakoa (% 30 gehiago) araua behin baino gehiagotan urratzen dutenek.
Donostian mugikortasun iraunkorragoa sustatzeko ahalegin zabalagoaren parte da eremua, eta, horrekin batera, besteak beste, garraio publikoaren eta aktiboaren erabilera sustatzea, hala nola oinez ibiltzea edo bizikleta erabiltzea ere bultzatuko dira. Gainera, proiektuak airearen kalitatea hobetzen eta zarata murrizten lagunduko duela espero da, eta horrek hiriko bizi-kalitateari mesede egingo diola.
