Gizartea
Donostia
Astelehen honetatik aurrera epaituko dute Santi Cocaren hilketagatik ihes eginda egon zen auzipetua
agentziak | eitb media
Fiskaltzak eta Donostiako Udalak 20 urteko zigorra eskatzen dute bere aurka. Sei akusatuetatik, bost jada epaitu dituzte, eta lau absolbitu egin zituzten eta besteak hiru urte eta erdiko zigorra jaso zuen.
-
Santi Cocaren hilketaren lehenengo epaiketa. Argazkia: EFE
Santi Cocaren hilketaren bigarren epaiketa astelehen honetan hasiko da, eta akusatuen aulkian eseriko da lehenengoan egon ez zen auzipetua, ihes eginda egon zena, Frantzian atxilotu zuten arte. Coca 2019an hil zen Donostiako dantzaleku baten kanpoaldean jipoia jaso ostean.
Lehenengo epaiketan, 2023ko azaroan eta abenduan Gipuzkoako Auzitegian egin zenean, akusatuetako lau absolbitu egin zituzten, eta beste bati hiru urte eta erdiko kartzela-zigorra jarri zioten arduragabekeriazko hilketa egotzita, baina intoxikazio etilikoaren aringarriarekin.
Lehenengo saioa astelehen honetan izango da, 09:30ean, Gipuzkoako Auzitegian, eta epaimahaiaren osaketari ekingo diote. Atariko kontuen txanda izango da, alegazioak ere aurkeztu ahalko dira, eta denbora ematen badu, idatziak irakurriko dituzte.
EAEko Justizia Auzitegi Nagusitik jakinarazi dutenez, testigantzak azaroaren 6an, 7an, 8an eta 11n izango dira, eta 12an adituen proba egingo dute.
13an adituen probarekin jarraituko dute, eta 14an izango da akusatuaren deklarazioa.
Ondoren, ondorioak eta txostenak aurkeztuko dituzte, eta 18an emango zaio epaimahaiari ebazpena emateko txostena. Saio guztiak 09:30ean hasiko dira.
