Gizartea
EHU
EHUk kargutik kendu du sarean mezu matxistak, arrazistak eta ultrak zabaldu zituen Zuzenbideko irakaslea
EITB MEDIA
Ikasleek jarritako kexa batetik abiatuta, ordezko irakaslea lanpostutik apartatzeko prozedura jarri zuten abian, eta errektoretzak hura kargutik kentzea ebatzi du. Lan poltsatik ere kanporatu egin dute.
-
EHUren Bizkaiko Campusa. Artxiboko irudia. Argazkia: EITB Media
EHUk kargutik kendu du sarean mezu matxistak, arrazistak eta ultrak zabaldu zituen Zuzenbide Fakultateko ordezko irakaslea. Errektoretzak ebatzi du ez duela probaldia gainditu.
Ikasleek jarritako kexa baten ondoren, urriaren 3an zabaldu zuen EHUk irakaslearen kontrako prozedura administratiboa, salatutako irakasleak "Euskal Herriko Unibertsitate publikoaren printzipio eta balioen kontrako mezuak" zabaldu zituelakoan.
Ondoren, unibertsitate publikoaren Berdintasun Zuzendaritzaren bitartez, Genero Indarkeriaren aurkako EHUren Protokoloan zehaztutako prozedura ere ireki zuten, eta kautelaz irakaslea irakaskuntzatik apartatzea erabaki zuen zuzendaritzak, harik eta prozedura bukatutzat eman arte.
Gaur zabaldutako ohar batean EHUk jakinarazi duenez, "beharrezkoak ziren txosten eta alegazio guztiak bildu eta aztertu" ondoren, "irakasle lanpostutik kendu da Alvaro Sanchez Fernandez eta unibertsitateak bertan behera utzi du sinatutako lan kontratua, langileak probaldia gainditu ez duelakoan".
Halaber, irakaslea lan poltsetatik kanporatzea ere erabaki da, eta, beraz, aurrerantzean ez du ordezkapenik egingo EHUn.
