Gizartea
Goialdeko borraska
Desagertutako pertsonen bila hasi dira berriro, ziurtzat jota hildakoen kopurua 95etik gorakoa izango dela
EITB Media
Agintariak ez dira ausartu desagertutakoen kopurua zehaztera. Aemetek erne jarraitzeko deia egin du eta alertapean jarri ditu Castello (Valentziako Erkidegoa) eta Tarragona (Katalunia). Valentziako Generalitateak 250 milioi euroko partida bideratuko du kaltetuei laguntza zuzenak emateko.
Espainiako hego-ekialdea era bortitzean kolpatu duen goi-geruzetako depresio isolatuak desagerrarazitako pertsonen bila hasi dira gaur berriro, eguna argitzearekin bat. Desagertutakoen kopurua zehaztu gabe dago, eta ziurra da hildakoen kopuruak gora egingo duela (95 dira gaur-gaurkoz, azken balantzearen arabera).
Biktima gehienak (92) Valentziako probintzian zenbatu dituzte, baina Albaceten, Cuencan (biak Gaztela-Mantxan) eta Malagan (Andaluzia) ere hildakoak izan dira. Kopuruokin, Espainiako Estatuko gertuko historian izandako hondamendi natural hilgarriena da goialdeko borraska honek eragindakoa.
Valentziako Generalitateko Larrialdiak Koordinatzeko Zentroaren arabera, Valentziako suhiltzaileak lurretik ari dira garbitze lanetan, pilatutako hondakinak erretiratzen. Printzipioz, ez dute aireko baliabiderik erabiliko gaurkoan, uste baitute ez dagoela inor teilatu eta enparauetan.
Gaztela-Mantxan, bestalde, egunsentiarekin batera abiatu dituzte Leturren (Albacete) desagertutako pertsonak bilatzeko lanak. Asteartean ubidetik atera zen errekaren inguruan miatuko ditu 150 pertsonek osatutako taldeak. Helikopteroak, hiru drone, eta pertsonak bilatzeko trebatutako txakurrak dituzte lagun.
250 milioi euroko laguntzak iragarri ditu Valentziako Generalitateak
Gaur sartu dira indarrean Espainiako Gobernuak ezarritako hiru dolu egunak. Estatuko Aldizkari Ofizialak dolua ezartzeko errege dekretua kaleratu du. "Espainiako nazioaren minaren lekuko, eta 2024ko urriaren 29 eta 30ean izandako uholdeetan hildako eta desagertutako pertsonen senitarteko eta gertukoei dolumina adierazteko", irakur daiteke testuan. Espainiako banderak haga erdian egongo dira larunbat gauerdira arte.
Valentziako Erkidegoko Koordinazio Zentro Operatiboa (CECOPI, gazteleraz) goizean bildu da (07:30ean), eta ondoren, agerraldia egin du Carlos Mazon Valentziako Generalitateko presidenteak. Mazonek udalerrientzako dirulaguntza zuzenak izango direla iragarri du, beste administrazioek martxan jarritakoen osagarri. Guztira, 250 milioi euroko partida bideratuko dute, herritarrek euren etxea edo ondasunak "berehala eta burokraziarik gabe" konpontzeko aukera izan dezaten (kaltetuko 6000 eurokoak izango omen dira). Gainera, jakinarazi du Europar Batasunari (EB) elkartasun funtsa martxan jartzeko eskaera egin diola.
Hain justu, kritiken jomuga izan da azken orduetan Valentziako Gobernua (PP eta Vox daude boterean), larrialdi egoeraz egindako kudeaketa tarteko. Izan ere, Estatuko Meteorologia Agentziak (AEMET) alarma gorria ezarri zuen astearte goizetik, baina Valentziako Erkidegoko agintariek ez zieten herritarrei alerta-mezurik igorri 20:00ak arte. Ordurako urek herri asko hartuta zituzten.
Horren harira, Mazonek esan du bidalitako alertak "unean-unean eta modu egokian" egin zirela eurei "jakinarazitakoa jakinarazten". Atzo Barne Ministerioak kritika egin zion Generalitateari, herritarrei igorri beharreko alertak berari zegozkiela gogorarazita.
Pedro Sanchez Espainiako Gobernuko presidentea eta Alberto Nuñez Feijoo PPko buruzagia Valentziako CECOPI zentroan izango dira gaur, hondamendiaren nondik norakoak bertatik bertara jarraitzeko.
Denboralea apur bat baretu da azken orduetan, baina oraindik 12 erkidego daude euriagatik abisu horipean. Tarragonan (Katalunia) eta Castellon (Valentziako Erkidegoa) alerta laranja dago ezarrita, ordubetean metro koadroko 40 litro edota 12 orduan 100 litro biltzea espero baitute.
Are gehiago, Aemet Espainiako Meteorología Agentziak ohartarazpena egin du goizean: "Goialdeko depresioa Espainiaren gainean dago. Ekaitza oso bortitzak ari dira gertatzen Castellon, atzo Andaluzian. Horrela jarraituko dugu datozen egunotan".
Buenos días.
— AEMET (@AEMET_Esp) October 31, 2024
¿¿Aviso de nivel naranja (peligro importante) en as provincias de Tarragona y Castellón.
Ya hay tormentas muy fuertes en la zona, especialmente en el norte de Castellón.
¡Sigue el tiempo adverso! ¡Precaución!#dana
Avisos actualizados:
¿https://t.co/BLdoSsO2Qv pic.twitter.com/lkcm52KacA
Zaintza lapurretak eta arpilatzeak saihesteko
Valentziako 113.000 herritarrek ez dute argindarrik eta milaka ur edangarri barik daude. Probintziako hainbat herri, Sedavi adibidez, ia isolatuta daude, eta jatekorik ere ez dute.
Hain justu, Guardia Zibilak jakinarazi du segurtasun indarrak uholdeak kaltetutako Valentziako hainbat herritan zaintza lanak egiten ari direla, hainbat denda, etxebizitza eta ibilgailutan lapurretak izan ostean.
Guztira, 120 errepide daude itxita uholde eta urak egindako kalteengatik. Besteak beste, Valentzian, Castellon, Cuencan, Cadizen, Malagan, Granadan, Zaragozan eta Teruelen daude arazoak. DGTk Valentziako errepideetatik ez ibiltzeko gomendioa eman du, beste egun batez.
Gainera, Andaluzia mendebaldean (Cadiz, Huelva eta Sevilla) joan-etorriak saihesteko ere aholkatu du.
Garraiobide publikoei dagokienez, distantzia erdiko trenen zirkulazioa etenda dago Sevilla eta Malaga artean, Arahal (Sevilla) udalerriko erreka batek gainezka egin ondoren.
ARGAZKIAK
