Gizartea
Arkeologia
Brontze Aroko kokaleku bat azaleratu dute PHT eraikitzeko lanek Tafallan
EITB MEDIA
Aurkikuntza horrek Nafarroako Historiaurreko biztanleriaren landa-jarduerak eta jarduera ekonomikoak dokumentatzeko aukera eman du. Kristo aurreko bigarren milurtekoaren erdialdean datatutako aztarnategia 2024ko Ondarearen Europako Jardunaldietan aurkeztuko dute.
-
130 egitura aurkitu dituzte ikerlariek 2 hektareako eremuan. Argazkia: Nafarroako Gobernua.
Zaragoza eta Iruñea arteko Prestazio Handiko Trenaren (PHT) linea eraikitzeko lanek Brontze Aroko kokaleku bat azaleratu dute Tafallan, Nafarroan. Aurkikuntzak Nafarroako Historiaurreko biztanleriaren erritu- eta ekonomia-jarduerak dokumentatzeko aukera eman dute. Hala, horren aurkezpena 2024ko Ondarearen Europako Jardunaldietan gauzatzea aurreikusten da.
Udalerriko legar-eremu batean egindako lanei esker, Historiaurreko 130 egitura aurkitu dituzte ikerlariek 2 hektareako zabaleran. Bertan hainbat elementu aurkitu dituzte; etxeak eta siloak, besteak beste.
Adituen datazioaren arabera, aztarnategia Brontze Arokoa da; Kristo aurreko bigarren milurtekoaren erdialdekoa, hain zuzen. Ikerlariek azaldu dutenez, garai hartan denbora laburreko egonlekua izan zen, Historiaurrean zehar oso ohikoak izan zirenak.
Lan arkeologiko guztiak amaituta, hondakinak Nafarroako Gobernuaren Arkeologia Funtsetan kontserbatuko dira, eta zaharberritzeko lanak egingo dituzte bertan.
Aurkezpen ofiziala
Aztarnategi arkeologikoak aurkezpen berezia izango du; izan ere, 2024ko Ondarearen Europako Jardunaldietan aurkeztea aurreikusi dute. Horretan, PHT linearen lanen aurrerapenak azalduko dituzte, aurkitutako hondakinak eta azterketen emaitzak aurkeztearekin batera.
Aurkezpenak Brontze Aroko bi hilobiren hondakinak azaleratuko ditu, orain arte herrian aurkitu diren zaharrenak.
Hainbat elementu aurkitu dira; ontziak, etxeak eta siloak tartean. Argazkia: Nafarroako Gobernua.
