Errenteriako sutean kaltetutako hiru familiari aldi baterako ostatu emango diete

Larunbatean Errenteriako (Gipuzkoa) etxebizitza batean izandako sutea dela-eta kaltetutako 18 familietatik hiru aldi baterako birkokatuko ditu Gipuzkoako Foru Aldundiko Gizarte Larrialdietako Zerbitzuak, Udalarekin koordinatuta.

Dena dela, aurreikusita dago astelehen honetan familia bakoitzaren egoera kasuz kasu aztertzea, udal-zerbitzuak koordinatuta, eta hori egindakoan zehaztuko dira egin beharreko hurrengo urratsak.

Sua 16:35 aldera piztu zen, Alfonso XI.a kaleko hainbat solairutako eraikin batean, eta igande goizaldean itzali dute suhiltzaileek erabat. Ez da inor zauritu, baina 10 pertsona artatu behar izan dituzte kea arnasteagatik, Eusko Jaurlaritzaren Segurtasun Sailak jakitera eman duenez.

Aizpea Otaegi Errenteriako alkateak adierazi duenez, sutean ez da inor zauritu, baina "kalte materialak oso garrantzitsuak" dira, eta bizilagunek etxetik kanpora eman dute gaua. Guztira 18 etxebizitza hustu dituzte.

Colaboración fuera de nuestra zona con @SuhiltzaileGIP por #fuego de vivienda en #Errenteria.

Movilizamos 3 vehículos y rescatamos 6 personas aisladas en el tejado.

Estamos extinguiendo el fuego del tejado.

Junto a bomber@s de Oria, Kosta y Bidasoa.@BomberosEuskadi

— Donostiako Suhiltzaileak (@BomberosDonosti) July 13, 2024

Donostiako, Oriako, Urola Kostako eta Bidasoko suhiltzaileak bertaratu dira, eta gutxienez sei bizilagun erreskatatu behar izan dituzte; izan ere, teilatura igo ziren garretatik babesteko. Suhiltzaileak garrak itzaltzeko lanean aritu dira gau osoan, eta 05:00ak aldera lortu dute guztiz itzaltzea.

Suhiltzaileek teilatua tinkotu behar izan dute sua itzaltzeko lanean ari zirenean, eta, azaldu dutenez, suak Alfonso XI.a kaleko hiru atariri eragin die, eta bizilagun guztiak atera behar izan dituzte etxetik.

0:42

Sutea piztu da Errenteriako erdiguneko etxebizitza batean