Aurtengoa izan da apirilik beroena munduan, hamaika hilabetez jarraian bero markak hautsita

Tenperatura erregistroak daudenetik, 2024koa izan da apirilik beroena munduan, hamaika hilabetez jarraian bero markak hautsita. Europako Batzordearen mendeko Copernicuseko Klima Aldaketaren Zerbitzuak (C3S) zabaldu du gaur datua, hilero argitaratzen duen txostenean. Bertan zehazten duenez, 2015-2016 urteetan antzeko "ezohiko" joera bat izan zen.

Azken 12 hilabetetako tenperaturei erreparatuta (2023ko maiatzetik 2024ko martxora) ere, inoizko altuenak erregistratu dira; 1991-2020 urteetakoa bataz bestea baino 0,73  ºC gainetik, eta industriaurreko garaia baino, 1,61 ºC gehiago. Apirileko datua bakarrik kontuan hartuta, berriz, 1,58 ºC beroagoa izan da tenperatura, 1850-1900 aldiarekin alderatuz.

Itsasoko tenperaturaren bilakaera ere neurtzen du Copernicusek, eta txostenak dio joan den hilean itsas-tenperatura, batez beste, 21,04 °C-koa izan zela, apirilean inoiz jaso den beroena. Martxoko tenperatura ( 21,07 °C) baino zertxobait apalagoa da datua.

Egoeraren larritasunaz ohartarazi du Carlo Buontempo C3Seko zuzendariak, eta esan du "berotegi-efektua eragiten duten gasen pilaketa geroz eta handiagoa" dela eta, ondorioz, tenperaturak igotzen jarraituko duela, markak etengabe hautsiz.

Bestalde, apirilean Artikoko itsas-izotzaren hedadura batez bestekoaren % 2 azpitik kokatu zen.