Gizartea
Gernika-Palestina
Alderdi, sindikatu eta kolektibo sozialek palestinarren genozidioa amaitzeko eskatu dute Gernikan
Agentziak | EITB Media
Ehunka herritar ere batu dira Gernikaren bonbardaketaren 87. urteurrenaren harira Gernika-Palestina ekimenak deitutako protestara, erasoa salatzeaz gain, nazioarteak estatu palestinarra aitor dezala eskatzeko.
-
Psikologian doktorea den Hithem Abdulhaleem palestinarra hizketan, gaur Gernikan. @GerPalesti2023
Alderdi politikoetako, sindikatuetako eta gizarteko kolektiboetako ordezkariek, eta ehunka herritarrek, bat egin dute larunbat honetan Gernika-Lumon palestinarren genozidioa amaitzea eskatzeko deitutako protestarekin.
Gernika-Palestina herri ekimenak deitu du protesta, Gernikako bonbardaketaren 87. urteurrenaren harira, eta Pasealekuan egindako ekitaldian, EAJ, EH Bildu, PSE-EE, Ezker Anitza-IU eta Sumar alderdi, koalizio eta mugimenduetako kideak eta Udalean ordezkaritza duten alderdi guztietako ordezkariak izan dira. ELA, LAB, CCOO Euskadi, Steilas eta Etxalde sindikatuetako ordezkariak eta hainbat gizarte kolektibotakoak ere izan dira bertan.
Protestan irakurri duten adierazpenean, azken hilabeteetan "Israelek Gazako Zerrendaren aurka egindako eraso izugarria eta palestinarren genozidioa" salatu dituzte, eta "euskal herritarren Palestinarekiko elkartasuna" nabarmendu.
Ekimenaren bozeramaileek ohartarazi dutenez, "Israelen jokabidearen ondorioz, Gazan gosetea hedatzeko arriskua dago. Horrekin batera, Israelek Damaskon egindako erasoek eta Irandik misilak eta droneak jaurti izanak tentsioa areagotu dute eskualde osoan". Hala, azpimarratu dutenez, "gaur egun Palestinan bizi den egoera lazgarria hedatuko den beldur" dira.
"Gernikako herria gara, herri solidarioa gara; ez dugu herri bakar bat ere utzi nahi indartsuenaren legearen menpe", azpimarratu dute, eta "herrien subiranotasuna onartzeko" eskatu dute, "etorkizuna kanpoko tutoretzarik gabe erabakitzeko". Halaber, "ezberdintasunak modu baketsuan konpontzeko eta eskalada militaristak saihesteko" ere eskatu dute.
Horrela, "NBEk Israeli eta Palestinari lortuta zabaldutako ebazpenak zorrotz betetzeko eta nazioarteko komunitateak Palestinako Estatua onartzeko" eskatu dute.
Adierazpen horren bitartez, Espainiako Gobernuari eta erakundeei eskatu diete Israelekin arma-merkataritza eten eta neurriak har ditzatela, "Israelgo Estatua behartzeko bere apartheid politikak, legez kanpoko kokaguneak eta sarraskiak bertan behera uztera".
