Gizartea
Ingurumena
Emisio baxuko eremu berria ekainean ezar liteke Bilbon
EITB MEDIA
Bilboko Udalak ezohiko osoko bilkura monografikoa deitu du maiatzerako, emisio baxuko eremuaren ordenantza behin betiko onartzeko.
-
Hareatza ingurua, artxiboko irudian. Argazkia: EITB MEDIA
Joan den abenduan, hiribilduan dabiltzan errekuntza-motorra duten ibilgailuentzako muga berria arautzen duen ordenantza onartu zuen Bilboko Udalak. Aurreikusitakoaren arabera, plan hori pixkanaka joango da ezartzen, 2029ko amaierara arte. Hala ere, arau orokor gisa, A etiketa duten edo etiketarik ez duten ibilgailuei aplikatuko zaie aurrena. Urtebete geroago, B gisa katalogatutako ibilgailuei eragingo die eta, gainera, hainbat luzamendu egongo dira, kasuistika desberdinei aurre egiteko.
Emisio baxuko eremuak Abandoko barrutia hartuko du, hau da, itsasadarrak mugatutako eremua, eta baita Sabino Arana, Trenbidearen etorbidea, Autonomia eta Bailen kaleak ere.
Maiatzeko osoko bilkura monografiko horretan onartzen bada, eremu berria ekainaren hasieran ezar daiteke.
