Gizartea
Manifestazioa
Atxilotu bat eta zenbait zauritu etxebizitza eskubidearen aldeko protesta batean, Gasteizen
agentziak | eitb media
Etxe bat okupatzen saiatu dira etxebizitza falta eta prezio garestiak salatzeko, eta orduan hasi dira istiluak Ertzaintzarekin.
Pertsona bat atxilotu dute eta zenbait manifestari eta sei ertzain zauritu dira bart Gasteizen etxebizitza eskubidearen alde GKSk antolatu duen manifestazioaren ostean etxebizitza bat okupatzen saiatu direnean.
Arkupeko ibilbidean izan dira istiluak, etxebizitza falta eta prezio garestiak salatzeko protesta baten baitan pertsona batzuk etxebizitza batean sartzen ahalegindu direnean.
Udaltzaingoa bertaratu da hasieran, protestarietako batzuk identifikatzeko asmoz, baina istiluak hasi direnean Ertzaintzari deitu diote.
Segurtasun Sailak jakinarazi duenez, agenteak iritsi direnean, objektuak jaurti dizkiete, eta seiri lesioak eragin dizkiete. Horien ibilgailu bati kalteak egin dizkiote, eta manifestarietako batzuk zauritu dira.
Pertsona bat atxilotu dute istiluekin lotuta, agintaritzaren agenteen aurkako delitua egotzita.
Okupak etxebizitzaren barruan geratu dira.
