Gizartea
Gertakaria
Gasteizen bosgarren solairutik behera erori den haurtxoaren aita atxilotu dute
Agentziak | EITB Media
Gertakaria 16:45ean izan da Salburuan, Martxoak 8 etorbidearen eta Madril kalearen artean.
-
Ertzaintza gertakaria ikertzen ari da. Argazkia: EFE
Gasteizko Udaltzaingoak 11 hilabeteko haurtxo baten aita atxilotu du. Arratsaldean, bosgarren solairuko leihotik erori da, eta bizirik eraman dute Txagorritxuko Ospitalera. Haurtxoa larri dago, baina egonkor, senide batek EITB Mediari baieztatu dionez.
Iturri beraren arabera, bere egoerak hobera egin arte itxaroten ari dira Gurutzetako Ospitalera eraman ahal izateko. Aita atxilotu duten arren, senide horrek azaldu duenez, uste dute haurtxoa zabalik zegoen leihotik behera erori dela, aita-semeak siesta egiten ari ziren bitartean.
Gertakaria 16:45ean izan da. Haurra balkoirik eta terrazarik ez duen 15 altuerako etxebizitza eraikin batetik erori da. Eraikina Martxoak 8ko etorbidearen eta Madril kalearen artean dago, Salburuan.
Oraindik ez dute zehaztu zer gertatu den, baina Udaltzaingoak 21 urteko aita atxilotu du. Ondoren, Ertzaintzaren esku geratu da, eta haurra zergatik erori den argitzeko ikerketak bere gain hartu ditu.
