Gizartea
Indarkeria matxista
Gasteizko hilketa matxista saiakera salatu dute bilkura batean
EITB Media
Herritarrak eta erakundeetako ordezkariak udaletxe parean bildu dira goizean, atzo Arriaga-Lakua auzoko etxebizitza batean gertatutako eraso matxista gaitzesteko eta biktimari babesa adierazteko.
Gasteizko herritarrek eta erakundeetako ordezkariek hiriburuan gertatutako hilketa matxista saiakera gaitzetsi eta arbuiatu dute gaur. 31 urteko gizonezko batek labanez eraso zion bikotekideari, Arriaga-Lakua auzoko etxebizitza batean.
Bilkura isila goizean egin dute, udaletxearen parean. Bertan izan dira, besteak beste, Gasteizko Udalbatzako kideak, Maider Etxebarria alkatea buru zutela, eta beste erakunde batzuetako ordezkariak. Hala nola, Irma Basterra Arabako Batzar Nagusietako presidentea edo Denis Itxaso Espainiako Gobernuak EAEn duen ordezkaria. Denek ere babesa eta gertutasuna adierazi diete biktimari eta ingurukoei.
Bilkura amaituta, Maider Etxebarria alkateak salatu du "batzuek indarkeria matxista behin eta berriro" ukatzen duten bitartean, "hauxe da bizi dugun errealitate gogorra: erailketa-saiakera bat eta zauritutako emakume bat. Zorionez, bizitza salbatzea lortu du, baina hau onartezina da", azpimarratu du.
Horren aburuz, "honek agerian uzten du oraindik ere lan handia dugula egiteko eta ezin dugu atzerapauso bakar bat ere eman. Gure indar guztiekin borrokan jarraituko dugu gaitz honen aurka".
Denis Itxaso Espainiako Gobernuak EAEn duen ordezkariak, bestalde, "sakoneraino txertatuta dagoen matxismo hiltzaileari" erantzuteko egin dio biztanleari.
