Gizartea
ESPAINIAKO GOBERNUA
Osasun Ministerioak musukoaren derrigortasuna ezarri du ospitaleetan eta osasun-zentroetan
AGENTZIAK | EITB MEDIA
Hala ere, Ministerioak maskararen ezarpena malgutzea erabaki du, bi astez arnas birusaren beheranzko intzidentzia metatuta duten autonomia-erkidegoetan. Horietan derrigorrezkoa izatetik gomendagarria izatera igaroko da.
Osasun Ministerioak agindu bat bidali die autonomia-erkidegoei gaurtik aurrera maskarak osasun-guneetan nahitaez erabili behar direla jakinarazteko. Hala ere, Ministerioak azkenik maskararen ezarpena malgutzea erabaki du bi astez arnas birusaren beheranzko intzidentzia metatuta duten autonomia-erkidegoetan. Horietan derrigorrezkoa izatetik gomendagarria izatera igaroko da.
Hala jakinarazi du Monica Garcia Osasun ministroak prentsaurreko batean, gripearen eta arnas aparatuko beste infekzio batzuen gorakadaren eragina murrizteko neurriak azaltzeko. Azpimarratu duenez, agindua ez da oraindik erkidego guztietara bidali, baina egunean zehar egongo da indarrean.
Monica Garciaren esanetan, "maskara nahitaez erabiltzea gomendagarria izango da azken bi asteetan arnas infekzio akutuen intzidentzia metatuaren beherakadaren datuak dituzten erkidegoetan". "Ez dago kurbaren jaitsieraren atalase kuantitatibo bat, kualitatiboa baizik", azaldu du ministroak.
"Ministerioak bere gain hartzen du erkidegoetan izan den epidemiaren bilakaera desberdin hori, eta, aldi berean, beharrezko abal juridiko hori ematen die behera egiteko denbora gehiago behar dutenei", adierazi du Garciak. "Egoera epidemiologiko orokorrera egokitzen joango gara", gaineratu du.
Osasun Ministerioaren arabera, lehentasunezko helburua autonomia-erkidegoei babes juridikoa ematea da, "eta, aldi berean, autonomia-erkidegoen berezitasuna eta datu epidemiologikoetara egokitzeko gaitasuna aitortzen ditu".
Osasun Sistema Nazionalaren Lurralde arteko Kontseiluaren bileran autonomia erkidegoekin akordiorik lortu ez ostean hartu du erabakia Osasun Sailak. Bilera joan den astelehenean izan zen, arnas birusak eragindako infekzio-kasuen hazkundearen baitan.
Hala, aginduak ospitaleak eta osasun-zentroak hartzen ditu soilik, ez zentro soziosanitarioak edo farmaziak, lurralde arteko kontseiluan aurkeztutako proposamenean jasota zegoen bezala.
Noiz sartuko da indarrean agindua?
Agindua erkidegoek jaso ondoren sartuko da indarrean, BOEn argitaratu beharrik gabe, Osasun Ministerioaren arabera.
Masukoa derrigorrezkoa da dagoeneko sei erkidegotan: Valentziako Erkidegoan (PP eta Vox); Katalunian (ERC); Murtzian (PP); Aragoin (PP), Kanarietan (CC), eta Asturiasen (PSOE). Neurri horren ondorioz, gainerakoek, gomendio baten alde zeudenek, osasun-zentroetan eta ospitaleetan erabili beharko dute.
Osasun-zentroetan musukoaren nahitaezkotasuna ezartzeko eskumena erkidegoek berek hartu zuten beren gain, baina, orain, Osasun Sailak esan du Osasun Sistema Nazionalaren kohesioari eta kalitateari buruzko Legearen 65. artikuluan oinarritzen dela derrigortasuna ezartzeko.
Agindu horren arabera, Osasun Ministerioari dagokio osasun publikoko jarduera koordinatuak deklaratzea, aldez aurretik Osasun Sistema Nazionaleko Lurralde arteko Kontseiluak hala erabakita, zuzenean ukitutako erkidegoei entzunaldia emanda, premia larriko egoeretan izan ezik; kasu horretan, "behar-beharrezkoak diren neurriak hartuko dira eta hartutako neurrien berri emango zaio premiaz".
Adierazpen horrek "alde guztiak behartzen ditu", eta "osasun publikorako arrisku edo alarma bereziko egoerei erantzun behar die", besteak beste.
