Gizartea
IKERKETA, ABIAN
Emakume bat hil da Deban, etxean zela, kanpotik egindako tiro bat jaso eta gero
AGENTZIAK | EITB MEDIA
Emakumearen senideek 15:00ak aldera deitu dute larrialdi zerbitzuetara. Iritsi direnean, biktima lurrean aurkitu dute, buruan zauri odoltsu bat zuela. Leiho batean, kanpoaldetik egindakoa zirudien zulo bat aurkitu du Ertzaintzak.
Emakume bat larri zauritu da Debako etxebizitza batean zegoela, ustez suzko arma baten tiroa jasota, eta handik ordu batzuetara hil da, Donostia Ospitalean, Eusko Jaurlaritzako Segurtasun Sailaren esanetan. Azaldutakoaren arabera, "inguruan ehiztariak zebiltzan uxaldi bat egiten", baina ez dago baieztatzerik hortik etorri den tiroa.
EITB Mediari baieztatu diotenez, Ertzaintzak ikerketa abiatu du ehiztariak baimendutako tokian ari ziren jakiteko.
Biktimaren senideek 15:00ak baino lehentxeago deitu zute larrialdi zerbitzuetara, gertatutakoaren berri emanez. Anbulantzia bat, Udaltzaingoa zein Ertzaintzaren patruila bat iritsi direnean, lurrean aurkitu dute emakumea, burutik odola zeriola.
Emakumea etxebizitzan artatu dute lehenbizi, eta, ondoren, Donostia Ospitalera eraman dute. Bertan zendu da, 18:45 aldera.
Agenteek egiaztatu dutenez, leiho bateko kristalean zulo bat zegoen, kanpotik egindakoa antza.
Ertzaintzak ikerketa ireki du zer gertatu den argitzeko.
