Gizartea
Trafikoa
Motor gidari bat hil da N-1ean, Ordizian, istripuan
EITB Media
Zorigaiztoko ezbeharra bart izan da, 21:30ean. Gasteizera bidean zihoan motorra bidetik irten da, eta segurtasun hesia jo du. 48 urteko gizonezkoa da zendutakoa. Lau egunean, EAEko errepideetan hildako laugarren pertsona da, hirugarren motozalea.
Motor gidari bat hil da bart N-1ean, Ordizian (Gipuzkoa), izandako trafiko istripu batean, Eusko Jaurlaritzako Segurtasun Sailak ohar batean jakinarazi duenez. Lau egunean EAEko errepideetan hildako laugarren pertsona da, hirugarren motozalea.
Ezbeharra bart jazo da, 21:30ean eta aipatu errepidearen 420,8 kilometro puntuan. Argitu gabeko arrazoiak tarteko, Gasteizera bidean zihoan motorra bidetik irten da, eta segurtasun hesiaren kontra egin du.
Gidaria, 48 urteko gizonezkoa, bertan hil da, bertaratutako osasun zerbitzuak suspertzen saiatu badira ere.
Istripua tarteko, eta motorra bidetik kendu eta galtzada garbitu bitartean, errei bat itxita egon da. Ez da ilararik sortu.
Gorpua Donostiako Auzitegi Medikuntzako Zerbitzura eraman dute, autopsia egin diezaioten. Ertzaintzak, bestalde, atestatua zabaldu du, ezbeharraren nondik norakoak argitzeko.
