Gizartea
Denboralea
Haize- eta olatu-arriskuaren aurreko abisuak igandera arte luzatuko dira
EITB MEDIA
Abisu laranjak eta horiak indarrean egongo dira asteburuan, batez ere kostaldean.
Euskal Autonomia Erkidegoa astintzen ari den haize- eta olatu-denboraleak hainbat abisu meteorologikoren pean mantenduko du lurraldea asteburu osoan; izan ere, Eusko Jaurlaritzako Segurtasun Sailak baldintza meteorologikoen aurreko abisuak eguneratu ditu, eta abisu berriak ezarri ditu olatu- eta haize- arriskuagatik.
Gaur, ostirala, gauerdian alerta laranja ezarri dute itsasaldean nabigazio-arriskuagatik lehen bi milietan, eta 21:00ak arte egongo da indarrean. Tarte horretan, olatuek 6 metroko altuera harrapa dezakete, eta 5 metrokoa arratsaldean; mendebaldeko haizeak 7ko indarrez joko du, tarteka 8koaz, batez ere egunaren lehen partean. 21:00etatik aurrera eta gauerdira arte, alerta laranja abisu hori izatera pasako da, 4-5 metroko olatuak eta 5-6 indarreko mendebaldeko haizea direla eta.
Gainera, gauerditik 21:00ak arte, abisu horia izango da kostan, olatuen ezaugarrien eta mendebaldeko haize zakarraren ondorioz pasealeku eta malekoietan zipriztin eta olatu-zaparrak erori baitaitezke, bereziki itsasgora garaian (20:21ean).
Haizeak protagonista izaten jarraitzen du, eta, horregatik, Euskalmetek abisu horia ezarri du haizeagatik kostaldean, 06:00etatik 18:00etara (hiru ordu luzatu da). Mendebaldeko haize-boladek 100 km/h-ko abiadura gaindi dezakete kostaldean. Bestalde, mendi inguruetan haize-boladak 70-100 km/h-koak izan daitezke. Haizeguneak ez diren lekuetan, haize-boladak 70-80 km/h-koak izan daitezke, batez ere kostaldetik gertu.
Haizeak gogor jo du bart Euskal Herriko hainbat tokitan, eta 149 km7h-ko ufadak izan dira Matxitxakon, 111 km/h-koak Oizen eta 105,5 km/h-koak Untzuetan (Orozko).
Larunbatean, abisu horia egongo da indarrean itsasaldeko arriskuagatik, goizaldean 4 metro inguruko olatuak izango baitira; 3-3,5 m-ra jaitsiko dira goizean, eta gauean berriro igo, 4-5 metrora arte.
Haizeak zeresana ematen jarraituko du, eta Euskalmetek hainbat abisu iragarri ditu. Egun osoan, abisu horia egongo da indarrean haizeguneetan, 100 km/h-ko abiadura gaindituko duten boladengatik. Abisu hori alerta laranja bihurtuko da 06:00etatik 12:00etara, hego-mendebaldeko haize-boladek 120 km/h-ko abiadura gaindi dezaketelako, bereziki mendebaldeko mendi inguruetan.
Haizeguneak ez diren lekuetan ere abisu horiak aktibatuko dira haizeagatik, hego-mendebaldeko haize-boladak 80-90 km/h ingurukoak izan baitaitezke.
Igandean ere haizeak gogor joko du goizean, eta gauerditik 06:00ak arte abisuak egongo dira indarrean. Haizeguneetan, boladak 100 km/h-koak izan daitezke, eta 80 km/h-tik gorakoak haizeguneak ez diren lekuetan.
Igandean, ordea, itsasoa izango da arreta-gune. 00:00etatik 15:00etara, nabigaziorako alerta laranja egongo da indarrean itsasaldeko arriskuagatik. Tarte horretan, olatuek 5 metroko altuerara irits daitezke goizaldean, baita 6 metrora ere goizean zehar. Mendebaldeko haizeak 6ko indarrez joko du, eta itsaso zakarra eragingo du. Egunaren erdialdeko orduetan indarra galdu, eta 4-5eko indarrarekin ibiliko da; itsaskia edo itsaski handia eragingo ditu.
