Gizartea
Erreskateak
Mendian galdutako hiru pertsona erreskatatu dituzte goizaldean Nafarroan
Agentziak | EITB Media
Foru erkidegoko larrialdi zerbitzuek Lizarragan (Ergoiena), Izaban eta Otiñanon (Torralba del Rio) lan egin dute ostiral gauean eta larunbat goizaldean.
-
Suhiltzaileak, lanean Otiñanon. Argazkia: Nafarroako suhiltzaileak
Larrialdi zerbitzuek galdutako hiru pertsona erreskatatu dituzte Lizarragan (Ergoiena), Izaban eta Ontiñanon (Torralba del Rio), Nafarroan, ostiral gauean eta larunbat goizaldean.
Galdutako lehen pertsona 71 urteko gizon bat zen. Ostiral goizean Lizarraga inguruan bizikleta elektrikoz ibiltzera irten zen eta ez zen itzuli. SOS Nafarroak 19:19an jaso zuen abisua, eta Foruzaingoak onik aurkitu zuen 21:50ean, Dulantz mendiko pista batean.
Bigarren bilaketa 21:58an hasi zen, Pirinio Atlantikoetako suhiltzaileek Izaba inguruan noraezean eta janaririk gabe zegoen mendizale baten deia jaso ondoren. Nabaskozeko suhiltzaileek aurkitu dute 58 urteko mendizalea, 2:44an, Larrako eski-pistetan.
Intervenimos la noche del #viernes al #sábado para rescatar a un montañero perdido en #Larra (#Isaba) que no podía continuar al caer la noche y quedarse sin agua
— Bomberos y Bomberas – Suhiltzaileak (@bomberos_na) October 7, 2023
No necesita asistencia sanitaria#ParqueNavascués pic.twitter.com/vLEOJ1QLHY
Hirugarren bilaketa 22:24an hasi zen, Otiñano inguruan perretxikoak biltzera atera zen gizon bat desagertu ostean. Lizarrako Parkeko eta Erreskate Teknikoko Taldeko suhiltzaileek, Foruzaingoaren eta Guardia Zibilaren patruilek, kamera infragorriak dituzten droneek, Salbamenduko Txakurren Taldeak, anbulantzia batek eta inguruko guardiako mediku-taldeak parte hartu dute. 69 urteko gizona 5:53an topatu dute.
