Futbol Federazioak Andreu Camps idazkari nagusi kargutik kendu du eta barkamena eskatu die jokalariei

Munduko Futbol Txapelketa irabazi zuten jokalariei babesa adierazi eta federazioak etapa berri bati ekin behar diola onartu ondoren, Espainiako Futbol Federazioak iragarri du Andreu Camps idazkari nagusi kargutik kendu duela. Oraingoz, ez dute ordezkorik izendatuko, eta haren funtzioak Elvira Andresek eta Alfredo Olivarek hartuko dituzte euren gain, txandakatuz, harik eta erakunderen barruan egingo duten hauteskunde prozesua amaitu arte.

Kaleratu duten oharrean, Federazioak esan du jakitun direla etapa berri bati ekiteko "premia" duela erakundeak, Munduko Txapelketaren ondoren zabaldutako krisia lehenbailehen ixteko. Halaber, futbol jokalariei babesa adierazteaz gain, barkamena ere eskatu diete, bereziki, Jenni Hermosori, bizitzen ari diren egoera zailagatik. "Beti babestuko ditugu", dio testuak.

Erakundearen barne-antolaketa berritzeko "aldaketak azkartu" egingo dituztela jakinarazi du erakundeak, eta ziurtatu du jokalariei eman dietela jada euren asmoen berri. "Espainian futbolak aitortza osoa merezi du eta parte hartzen dugun guztiok bat egin behar dugu hori lortzeko", zehaztu du.

39 jokalarik, horien artean munduko 23 txapeldunetatik 21ek, emakumezkoen futboleko organigramaren goitik beherako berregituraketa eskatu zioten Futbol Federazioari joan den ostiralean. Hori egin artean, selekzioarekin jokatzeari uko egiten diotela adierazi zuten.