Gizartea
Bilboko Aste Nagusia
Bilboko Aste Nagusia abuztuaren 20an jaitsiko da itsas hondora Balearen desfile herrikoiarekin
EITB
19:00etan abiatuko da, Plaza Biribilean hasita, eta, zenbait lagunekin batera, itsasoko gizakiak gorpuztuko dituzten bost puzgarri erraldoi izango dira protagonistak: “Baly” balea, olagarroa, txangurroa, bisigua eta txirla.
-
2022ko Balearen desfile herrikoia. Argazkia: Bilboko Udala.
Balearen desfile herrikoiak abuztuaren 20an, igandean, bisitatuko du Bilboko Aste Nagusia. Plaza Biribiletik abiatuko da, 19:00etan, eta, ondoren, Kale Nagusia zeharkatu, eta Maria Diaz de Haro kalearekin bat egiten duen bidegurutzean amaituko da.
Urtero bezala, itsasoarekin lotutako bost puzgarri erraldoiak izango dira protagonistak: "Baly" balea, olagarroa, txangurroa, bisigua eta txirla. Hala ere, horiek beste lagun batzuekin batera ibiliko dira Bilboko kaleetatik; izan ere, otarrainak, marmokak, itsas zalditxoak, karramarroak eta abar izango dituzte lagun. Desfile osoan zehar, pertsonaia, konpartsa, fanfarre, txaranga, antzerki eta musika taldeak arituko dira kaleak girotzen.
Pertsonaia horien artean, arpoilariak, sukaldariak, hiriko dantzariak, txotxongiloak eta abar egongo dira, baita Itsasoko Lehoiak konpartsa ere. Konpartsa hori saregile eta paketatzaile lanbideak omenduko dituzten emakumeek soilik osatuko dute, eta euskal portuetako emakumezkoen lanbide zaharrak gogoratuko dituzte.
Aurten, nobedade gisa, 16:00etatik aurrera, desfileko hiru puntutan, Oteizaren eskulturan (udaletxearen aurrean), Plaza Biribilean (turismo-bulegoaren aurrean) eta Moyua plazan, opari-poltsak banatuko dituzte, guztiak amaitu arte.
