Gizartea
Nafarroa
ZIUan oso larri jarraitzen du amak Fiteron zauritutako 3 urteko haurrak
EITB Media
Emakume bat ustez bere 3, 5 eta 9 urteko hiru seme-alabak hiltzen saiatu zen ostegunean, Nafarroako udalerrian. Adingabeak zauritu egin zituen, eta Nafarroako Unibertsitate Ospitalera eraman behar izan zituzten. Ama Tuterako ospitalera eraman zuten, eta han dago atxilotuta.
Emakume bat ustez 3, 5 eta 9 urteko hiru seme-alabak hiltzen saiatu zen ostegunean, Fiteron (Nafarroa). Adingabeak zauritu zituen, eta Nafarroako Unibertsitate Ospitalera eraman behar izan zituzten, Iruñera. Hiru urteko haur txikiena oso larri dago ZIUan, intubatuta.
Gertakariak ostegunean jazo ziren, 12:00ak aldera. Antza denez, 5 eta 9 urteko bi seme nagusiak kalera atera ziren laguntza eske, horietako batek ahoan hantura zuela, eta bizilagunek Guardia Zibilari deitu zioten. Agenteak bi haurrekin batera sartu ziren etxean, eta ama eta 3 urteko semea aurkitu zituzten.
Dirudienez, ama bere buruaz beste egiten saiatu zen. Tuterako ospitalera eraman zuten, eta atxilotuta dago. Ikerketako iturriek adierazi dutenez, amak pozoia hartu zuen bere buruaz beste egiteko.
Miguel Aguirre Fiteroko alkateak azaldu duenez, herria "atsekabetuta, erabat harrituta eta kezkatuta" dago gertatutakoaren berri izan ostean. Miguel Aguirrek adierazi duenez, "2.000 biztanleko herri batean ez duzu inoiz pentsatzen horrelakorik gertatuko denik, baina gertatu da eta gorputza izoztuta daukagu".
"Hasieran dena nahasmena zen, baina gertatutakoa argituz joan da, eta, ustez, ama seme-alabak hiltzen saiatuko zen edariren bat emanda, eta ustez arma zuriz egindako zauriren bat ere badute", erantsi du alkateak.
Alkateak iragarri du udal gobernua eta udalbatza bilduko direla gertatutakoari aurre egiteko eta adierazpen bat onartzeko.
