Gizartea
Migrazioa
Frantziako Justiziak bertan behera utzi du Hendaia eta Irun arteko mugako droneen bidezko kontrola
Agentziak | EITB Media
Honenbestez, Atzerritarren Defentsarako Abokatuen elkarteak, Etorkinekin Diakite federazioak eta Gipuzkoako SOS Arrazakeriak aurkeztutako eskaera onartu du Paueko Administrazio Auzitegiak ebazpenean.
-
Jendarmeen kontrola Santiago zubian. Artxiboko irudia: EITB
Frantziako Justiziak mugako drone bidezko kontrola bertan behera utzi du, SOS Arrazakeriak adierazi duenez. Gobernuz kanpoko erakundeak azaldu duenez, joan den ostegunean Paueko Administrazio Auzitegiak erabaki zuen Pirinio Atlantikoetako Prefetak 2023ko ekainaren 26an emandako agindua bertan behera uztea. Agindu horrek baimena ematen zuen ekainaren 26tik uztailaren 26ra bitartean aireontzietan instalatutako kameren bidez irudiak hartzeko, artxibatzeko eta transmititzeko.
Ohar batean azaldu duenez, Paueko eta Baionako abokatuek osatutako Atzerritarren Defentsarako Abokatuen elkarteak, Etorkinekin Diakite federazioak eta Gipuzkoako SOS Arrazakeriak aurkeztutako eskakizuna onartu du auzitegi horrek ebazpenean.
Ildo horretan, adierazi du ebazpenak arrazoia ematen diela auzi-jartzaileei: "Agindu horrek modu larrian eta nabarmenki urratzen du bizitza pribatuaren eta familia-bizitzaren eskubidea".
Gipuzkoako SOS Arrazakeria pozik agertu da auzitegiaren ebazpenagatik, eta esan du posible dela "babesa aurkitzea oinarrizko eskubideak babesten dituzten legezko bermeetan, Frantziako Gobernuak horien aurka hartutako erabakien aurrean".
Azkenik, Frantziako eta Espainiako agintariei "pertsona guztiek zirkulazio askerako duten eskubidea errespetatzeko" eskatu die, eta, zehazki, Irun (Gipuzkoa) eta Hendaia (Lapurdi) artean ibiltzeko. Era berean, "poliziek sistematikoki egiten dituzten arraza-profileko kontrolak berehala etetea" eskatu dute.
