Gizartea
HARRAPATZEA
Hil egin da atzo auto batek Arizkunen harrapatu zuen 56 urteko emakumea
AGENTZIAK | EITB MEDIA
Arizkungo bizilaguna helikopteroz Nafarroako Unibertsitate Ospitalera eraman bazuten ere, bertan hil da. Ondorioz, bertan behera utzi dituzte Arizkungo jaiak eta Arizkun Rock musika jaialdia.
-
Harrapatzea gertatu zen tokia. Argazkia: Foruzaingoa
Hil egin da atzo Arizkungo herrigunean auto batek harrapatuta larri zauritu zen 56 urteko emakumea, Foruzaingoak gaur goizean jakitera eman duenez.
Larrialdi zerbitzuek 19:20an izan zuten istripuaren berri, eta Oronozko suhiltzaileak, Arizkungo guardiako mediku taldea, helikoptero medikalizatu bat, anbulantzia medikalizatu bat, oinarrizko bizi-euskarriko anbulantzia bat eta Foruzaingoaren patruilak bertaratu ziren.
Larrialdietako taldeek suspertzeko maniobrak egin zizkioten biktimari, eta, ondoren, helikopteroz eraman zuten Nafarroako Unibertsitate Ospitalera. Dena dela, bertan hil da, buruan hartu zuen kolpe larriaren ondorioz.
Emakumea oso pertsona ezaguna zen herrian, eta, ondorioz, bertan behera utzi dituzte Arizkungo jaiak eta Arizkun Rock musika jaialdia.
