Emergentzia kimikoak. Noiz sortu daitezke? Nola jokatu?

Hernanin, Muskizen, Santurtzin, Lantaronen, Zierbenan eta Abanto-Zierbenan sirena bereziak entzuten ari dira egunotan. Herritarrei emergentzia kimiko bat gertatu dela edota emergentzia hori amaitu dela jakinarazten dieten soinuak dira.

Herri horietan guztietan, enpresa kimikoak daude; alegia, eguneroko bizitzan beharrezkoak ditugun produktu kimikoak sortu, pilatu edo garraiatzen dituzten enpresak. Erregaiak, kloroa edo substantzia desinfektatzaileak dira horietako batzuk. Faktoria horien inguruetan bizi diren herritarrek larrialdi abisuak ematen dituzten soinu seinaleak ezagutu behar dituzte, baita emergentziaren bat gertatzen denean nola jokatu behar duten jakin ere.

Gure inguruan dauden enpresetan gerta daitezkeen istripuek suteak, leherketak, ingurugiroarentzat arriskutsuak diren isuriak edota airera substantzia toxikoak isurtzea eragin dezakete. Horrelako gertakari batek eragin kaltegarriak izango lituzke gertuen daudenen osasunean: hazkurak, narritadurak, erredurak azalean eta begietan eta arnasa hartzeko arazoak.

2:23

Zer da alerta kimiko bat?

Garrantzitsuena da gune itxi bat bilatzea eta larrialdia amaitu arte barruan egotea. Etxean, lantokietan, dendetan... eraikin barrura sartu behar da, eta leihoak eta ateak itxi. Horrez gainera, berogailuak edo aire girotuko makinak, elektrizitatea eta gasa itzaltzea ere gomendatzen da. Larrialdiak kalean harrapatu bagaitu, arnasbideak babestu behar ditugu, eraikin itxi batera iritsi arte, eta ez dugu autorik hartu behar.

Agintariek emergentziaren inguruko informazioa emango dute; beraz, informazioa hedabideen edo Internet bidez jasotzeko gomendatzen da. Horrez gainera, ez dugu seme-alaben bila ikastetxera joan behar: lantoki eta eskoletako langileek badakite zer egin behar duten kasu bakoitzean, eta haurrak seguru egoten dira.