Gizartea
Berdintasuna
Parekidetasunaren legeak emakumeen gutxieneko ordezkaritza % 40 sektore publikoan eta pribatuan
M. D. | EITB Media
Gizonezkoak (gehienetan ordezkaritza handiena duen sexua) ezingo da % 60 baino gehiago izan IBEX 35eko enpresa handietako administrazio-kontseiluetan, ez eta BJKN bezalako konstituzio-organoetan ere.
-
Parekidetasunaren legea.
Ministroen Kontseiluak bigarren itzulian onartu du ordezkaritza parekiderako lege organikoaren proiektua. Espainiako Gobernuan, enpresa handietako administrazio kontseiluetan, hauteskunde zerrendetan eta konstituzio organoetan emakumeen presentzia gutxienez % 40koa izan beharko da (ordezkaritza txikiena duen sexua da, kasu gehienetan).
Bigarren itzulian, Espainiako Gobernuak aldaketa bat egin du, "Konstituzio Auzitegiari, Estatu Kontseiluari, Kontseilu Fiskalari, Kontuen Auzitegiari eta Botere Judizialaren Kontseilu Nagusiari ere eragin diezaien, ordezkaritza parekidea izan dezaten", Nadia Calviño presidenteordeak zehaztu duenez.
Sektore pribatuari dagokionez, Calviñok azaldu du zehapen araubidea zorrotzagoa dela administrazio kontseiluetan betetzen ez denean. Aldiz, zuzendaritza postuen kasuan, enpresak azaldu beharko du araua betetzen ez den, protokoloak ezarri beharko ditu eta prozesuak berrikusi beharko ditu horrela gertatzen dela bermatzeko. Gainera, zehapen araubidea zorrotzagoa izango da kotizatutako enpresa handientzat.
"Lege honekin urrats garrantzitsua ematen dugu benetako parekidetasuna lortzeko, enpresa handiei eskakizun neurrigabeak ezarri gabe, eta, jakina, enpresa txikientzako baldintza horiek ezarri gabe, helburuak lortuko dituen erregimen bat izateko, enpresen funtzionamenduaren ikuspegitik gure ekonomian eragin negatiborik izan gabe", ziurtatu du.
