Gizartea
Bizkaia
Muskizen adingabe bat ustez bahitzen saiatzeagatik jarritako salaketa ikertzen ari da Ertzaintza
EITB Media
Bizkaiko udalerriko Udalaren arabera, gizon bat "adin txikiko batekin hitz egiten hasi eta hurbiltzeko eskatu zion atzo arratsaldean El Malecon futbol zelaiko parkingean". Gizonezkoa identifikatuta omen dute, iturrion arabera.
Ertzaintzak ikerketa zabaldu du atzo Muskizen (Bizkaia) adingabe bat bahitzen saiatzea leporatuta gizon baten kontrako salaketa aurkeztu ondoren, Eusko Jaurlaritzako Segurtasun Sailak EITBri baieztatu dionez. Dena dela, ikerketa abian denez eta tartean adin txikiko bat dagoenez, ez du datu gehiago eman.
Bizkaiko udalerriko Udalak atzo sare sozialen bidez eman zuen gertatutakoen berri. Kaleratutako oharraren arabera, salatutakoa arratsaldean gertatu zen, El Malecon futbol zelaiko aparkalekuan.
"Gaur (atzokoagatik) arratsaldean, udalerritik kanpoko heldu batek adingabe batekin hitz egin du El Malecon aparkalekuan, eta behin eta berriz esan dio hurbiltzeko", azaldu dute idatzian.
Udalaren arabera, susmagarria identifikatuta dago, kirol-instalazioen inguruetan jarritako bideozaintza-kamerei esker.
