LABek maiatzaren 1ean kaleak hartzeko deia egin du "erabateko aldaketa" baten mesedetan

LAB sindikatuak maiatzaren lehenean Iruñeko eta Tuterako kaleak hartzeko dei egin dio Nafarroako langile klaseari, LABen mobilizazioetan parte hartuz "erabateko aldaketa" behar dela aldarrikatzeko. Hala azaldu du gaur, astelehena, prentsaurrekoan, Imanol Karrera LABeko Nafarroako idazkari nagusiak. "Bizi dugun krisia estrukturala da, eta langileen bizitza oztopatu besterik ez du egiten. Bitartean, kapitalak aberasten jarraitzen du", gaineratu du Karrerak.

Nafarroako hiriburuko manifestazioa Gaztelu plazatik abiatuko da, 12:00etan, eta Tuterakoa, berriz, 12:30ean, Foru plazatik. Helburua langileek pairatzen duten prekarietate egoeraren erantzuleak nortzuk diren azpimarratzea, eta bizi- eta lan-baldintza duinak lortzeko funtsezko aldaketak erdigunera eramateko beharra helaraztea da, horren hitzetan.

"Hitzarmenak berritzeko garaia da, gutxienez 1.400 euroko soldata ezarri, lanaldia murrizteari buruzko eztabaidari heldu, zerbitzu publikoak hobetu eta zaintza-sistema publiko komunitario baten alde egiteko: ez dago aitzakiarik. Bestelako zerga-politika bat egiteko eta zerbitzu publiko duinak garatzeko eskumenak ditugu", aldarrikatu du Karrerak.

LABek 2022an Nafarroako langileen bizi- eta lan-baldintzei buruz egindako ikerketa sindikalaren arabera, Nafarroako langileen erdiak prekarietate egoeran bizi dira, lan duinik gabe eta diru-sarrera eskasekin. "Ondorioz, erabateko aldaketa beharrezkoa da", gehitu du. LAB sindikaturen ustez, ez da eraldaketarik emango patronala eta erakundeak horretara behartu gabe, aktibazio sindikal eta sozialaren bitartez.