Udako ordutegian sartu gara gaur

Gaur goizaldean ordua aldatu dugu, udako ordutegira moldatzeko. Hala, igande honetatik hasita, ordutegi berria izango dugu urriko azken asteburura arte.

Europar Batasunak 2001ean ezarri zien derrigorrezko ordu aldaketa estatu kideei, aurrezteko helburuarekin. Geroago, 2018an, Europako Batzordeak ordu aldaketa bertan behera uztea onartu zuen, 4,6 milioi europarren % 84ren adostasunarekin.

2019an, Europako Parlamentuak erabakia berretsi eta urtebeteko epea ezarri zuen egitasmoa gauzatzeko. Ezinezkoa izan zenez, 2021era atzeratu zuten aldaketa bertan behera uzteko erabakia, baina, oraindik ere EBko estatu kideek ordua aldatzen jarraitzen dute.

Ordutegi-aldaketa 2000/84CE Europako Zuzentarauaren parte da, eta Europar Batasuneko estatu kide guztiei eragiten die, arratsaldez eguzki-argia hobeto aprobetxatzeko. Aldaketa nahitaezkoa da, eta beti egun eta ordu berberetan gertatzen da Europar Batasun osoan. Estatu kide guztiak derrigortuta daude aldaketa egitera.

Energia-kontsumoa gutxitzeaz gain, beste hainbat abantaila ere ikusten dizkiote hainbat adituk,  hala nola garraioan, komunikazioetan, bide-segurtasunean, lan-baldintzetan, bizimoduetan, osasunean, turismoan edo aisialdian.

Hala ere, gero eta gehiago dira aldaketa ez dela egokia diotenak, baita kaltegarria dela defendatzen duten ahotsak ere.

Angel Largo Espainiako Ordutegiak Arrazionalizatzeko Batzorde Nazionaleko (ARHOE) idazkari nagusiak ordu aldaketarekin ez obsesionatzeko aholkatu du. Izan ere, bere ustez, "laster kenduko da". "Estatu Batuek aurten ezabatuko dute, eta Estatu Batuek zerbait egiten dutenean, Europak pixka bat geroago egiten du; beraz, ez gaitezen obsesionatu", nabarmendu du.

Bestalde, Largok gogoratu du ordutegi aldaketak "beti ondorio berberak" ekartzen dituela, "jetlag txiki bat", ordu aldaketa horren ondoriozko eguzki ziklo berrietara egokitzeko. Gehien sufritzen dutenak haurrak, adinekoak eta gaixotasun kronikoak dituztenak dira. Ordutegi berrira egokitzeko aholku gisa, eguzki-argiarekin esnatzen saiatzea eta argirik ez dagoenean atseden hartzea gomendatzen du.