Gizartea
ESPETXEAK
22 urteko preso bat hilda agertu da Arabako Espetxean
IDOIA ALBERDI ETXANIZ | EITB MEDIA
2020ko irailetik zegoen preso. Ez zuen aktibatuta suizidioak prebenitzeko protokoloa, horretarako "zantzurik ez" zutelako atzeman, Jaurlaritzaren arabera.
-
Arabako Espetxea, artxiboko irudi batean
22 urteko preso bat bere ziegan hilda aurkitu dute gaur goizean Arabako Espetxean. 2020ko irailetik zegoen preso, eta zigor luze bat betetzen ari zen, delitu larri batengatik. Ez zuen aktibatuta suizidioak prebenitzeko protokoloa, horretarako "zantzurik ez" zutelako atzeman. Bingen Zupiria Eusko Jaurlaritzako bozeramaileak eman ditu datuok, astero legez Gobernu Bileraren ondoren egindako agerraldian.
Bertan zehaztu duenez, espetxeko funtzionarioek aurkitu dute gorpua, 08:00etan, "gelak ireki eta espetxeratuen egoera egiaztatzeko orduan". Zupiriaren esanetan, berehala eman diote abisua kartzelako zerbitzu medikuari, baina ordurako hilda zegoen.
Gasteizko Zaintzako Epaitegiaren esku utzi dute kasua, gorpua altxatu eta dagozkion prozedurak abiarazteko. Halaber, Jaurlaritzaren bozeramaileak erantsi du Justizia Sailak informazio espedientea zabaldu duela gertatutako argitzeko. Espetxeko zuzendaritzak, bestalde, esan du "informazio guztia" helaraziko diola hildakoaren familiari.
Azkenik, heriotzagatik samina adierazi zu Zupiriak Gasteizko Gobernuaren izenean, eta doluminak helarazi dizkie presoaren gertukoei.
