Gizartea
Eguraldia
Haizeagatik eta sute arriskuagatik ezarritako abisu horiek arreta eskatzen dute Urtezahar gauean
Agentziak | EITB Media
Haizeari dagokion abisua Bizkaian eta Gipuzkoan egongo da indarrean igandera arte, eta sute arriskuari dagokiona Arabara ere iritsiko da. Piroteknia tentuz erabiltzera deitzen dute bi abisuek.
-
Haizea. Argazkia: Efe
Euskalmetek igandera arte luzatu du ostegunean urteko azken egunetarako ezarritako abisu horia, haize bolada bortitzengatik, Bizkaian eta Gipuzkoan, eta baso suteen arriskuagatik, baita Araban ere. Haize abisua osteguneko 06:00etan aktibatu zen, eta igandeko 00:00ak arte egongo da indarrean.
Azken orduetan Euskadin izan diren haize bolada gogorrek 142 kilometro orduko maximoak utzi dituzte Matxitxakoko neurketa estazioan, Bermeon, eta 100 km/h-ko abiadura gainditu da Bizkaiko beste puntu batzuetan ere. Besteak beste, 106 km/h-ko ufadak izan dira Cerrojako neurketa puntuan (Karrantza), 110 km/h-koak Zugaztietan (Trapagaran) eta 103 km/h-koak Urduñan.
Haizerik gabeko eremuetan, 78 km/h-ko boladak hauteman dira Galindoko neurketa puntuan, Sestaon, eta 97 km/h-koak Bilboko Zorrotza auzoan, Eusko Jaurlaritzako Segurtasun Sailak jasotako datuen arabera.
¿ Orain arte neurtutako haize-bolada indartsuenak:
— Euskalmet (@Euskalmet) December 31, 2022
¿ Matxitxako 142 km/h
¿ Punta Galea 115 km/h
¿ Arboleda 110 km/h
¿ Oiz 110 km/h
¿ Zorrotza 97 km/h
¿ Mutriku 94 km/h pic.twitter.com/yCot0YyFwV
Gainera, gaur, urteko azken egunean, abisu horia egongo da indarrean, baso suteak izateko arrisku handiagatik. Abisu horri Urteberri eguneko goizaldeko 03:00ak arte eutsiko zaio.
Hori horrela, Urtezahar gauean piroteknia tentuz erabili beharko da.
