Gizartea
Ezbeharra Bizkaian
Bost pertsona zauritu dira Kadaguako korridorean, kamioi batek eta sei autok elkar jota
EITB Media
Bost zaurituak Gurutzetako Ospitalera eraman dituzte anbulantzian, baina ez dute lesio larririk izan.
-
Kadaguako korridorea itxita, Balmasedako noranzkoan, istripu baten ondorioz
Bost pertsona zauritu dira gaur arratsaldean BI-636 errepidean, Balmasedarako noranzkoan zihoazen kamioi batek eta sei autok elkar jota.
Istripuaren ondorioz, errepidea erabat itxi dute Balmasedarako noranzkoan (Kadaguako korridorea), 19:10ean hasi eta bi ordu geroago arte.
Eusko Jaurlaritzako Segurtasun Sailak jakinarazi duenez, bost zaurituak Gurutzetako Ospitalera eraman dituzte anbulantzian, baina ez dute lesio larririk izan.
BI-636 errepidetik Soduperako irteeratik gertu izandako talkaren ondorioz, errepidea itxi behar izan dute Balmasedarako noranzkoan, eta, ondorioz, zirkulazioa aurreko irteera batetik desbideratu dute, eta auto-ilarak sortu dira.
21:10ean, errei bat zabaldu dute, eta 21:40an bidea libre geratu da, talkan inplikatutako ibilgailu guztiak kendu ondoren.
