Gizartea
'Bai bakarrik da bai' legea
Nafarroako Auzitegiak ez ditu "Bai bakarrik da bai" legeak jasotako zigorrak murriztuko
EITB MEDIA
Hala, ohar batean azaldu duenez, epaiak berrikusiko dituzte baldin eta ezarritako zigorra handiagoa bada lege berrian delitu horrentzat jasotako gehieneko zigorra baino.
-
Emakume bat "Ez da abusua, bortxaketa baizik" dioen kartel sostengatzen. Artxiboko irudia: EFE
Sexu-delituei buruzko lege berria beste behin hizpide da, oraingoan, Nafarroan. Foru Erkidegoko Auzitegiak erabaki du ez dituela kondenak murriztuko, baldin eta ezarritako zigorrak Sexu Askatasunaren Berme Integralari buruzko irailaren 6ko 10/2022 Lege Organikoak ezarritako lege-esparru berrian hala jasotzen badira.
Auzitegi Gorenak Sexu Askatasunaren Berme Integralari buruzko irailaren 6ko 10/2022 Lege Organikoaren atzeraeraginezko aplikazioari buruzko jurisprudentzia-doktrina ezarri bitartean, Nafarroako Auzitegiko bi zigor-atalek berrikuspen irizpide hauek ezarri dituzte.
Lege horretan sexu askatasunari eta sexu ukigabetasunari eragiten dioten arau penalen forma berria ezartzen denez, eta bertan ez dagoenez benetako korrelaziorik indargabetutako aginduekin, delitu berdinen konparazio objektiboa ahalbidetzen duenik, kondenak berrikusiko dira honako kasu hauetan:
1- Ezarritako zigorra Lege Organiko berriak delitu horretarako aurreikusten duen gehieneko zigorra baino handiagoa edo astunagoa denean.
2- Zigor Kodearen I. tituluko II. kapituluan jasotzen diren eta zigorra finkatzeari modu tasatuan eragiten dioten legezko irizpideak aplikatzearen ondorioz, legez aurreikusitako zigorraren tartea (gutxienekoa eta gehienekoa) objektiboki aldatzen denean, eta ezarritako zigorra Lege Organiko berriaren arabera delitu horrentzat ezarritako gehieneko zigorra baino handiagoa edo astunagoa denean.
Ez da zigorra berrikusiko ezarritako kondena ere ezargarria bada irailaren 6ko 10/2022 Lege Organikoak, Sexu Askatasunaren Berme Integralari buruzkoak, ezarritako lege-esparru berriaren arabera.
