Gizartea
hezkuntza legea
Steilas: "Ikasturte gatazkatsua aurreikusten da, etorkizuneko hezkuntza legea aldatzen ez bada"
agentziak | eitb media
Sindikatuko kideek elkarretaratzea egin dute gaur goizean Eusko Jaurlaritzaren aurrean, aurreproiektuaren testua gaitzesteko. Iturriotzen ustez, etorkizuneko Legeak ikastetxe pribatuen biziraupena bilatzen du.
-
Goizean Steilaseko kideek egin duten elkarretaratzea. EITB MEDIAko bideo batetik hartutako irduia.
Steilas irakaskuntzako sindikatuak astelehen honetan ohartarazi duenez, ikasturtea "gatazkatsua" izango da Euskadin, Hezkuntza Legearen aurreproiektuaren edukia aldatzen ez bada. Hala adierazi du Nagore Iturrioz Steilaseko ordezkariak astelehen honetan, Eusko Jaurlaritzaren egoitzaren aurrean, aurreproiektuaren testua arbuiatzeko egindako elkarretaratzean. "Ez saldu eskola publikoa" zioen pankarta zeramaten sindikatuko kideek.
Sindikatuko bozeramailearen hitzetan, etorkizuneko Legeak ikastetxe pribatuen biziraupena bultzatzen du. Are gehiago, hezkuntza zerbitzu publikoa dela esatea, "ikastetxe pribatuen erreskatea ahalbidetzeko" erabiltzen den eufemismoa dela irizten du. Era berean, aurreproiektuak euskara ez duela erdigunean jartzen kritikatu du Iturriozek, eta testua idazterako garaian Steilasen ekarpenak aintzat hartu ez izanaz kexatu da.
Hala eta guztiz ere, sindikatuko bozeramailea prest agertu da Hezkuntza Sailarekin negoziatzen jarraitzeko. Steilasek hezkuntza-komunitatean "aliantza posible guztiak" bilatuko dituela adierazi du, aurreproiektuaren egungo edukia aldatzeko, eta ez du baztertzen mobilizazioak deitzea.
Gainera, 1987ko legeak itunpeko ikastetxeen kuotak debekatzen dituela ere kritikatu du Iturriozek, nahiz eta praktikan kuota horiek kobratu egiten diren.
