Gaur hasiko da Gipuzkoako serie-bortxatzailearen aurkako hirugarren epaiketa

Gipuzkoako serie-bortxatzailea hirugarren aldiz eseriko da akusatuen aulkian gaurtik aurrera. Oraingoan, 2012 eta 2015 artean Andoainen, Tolosan eta Anoetan izandako hiru sexu eraso egin izana egotzita epaituko diute. Aldez aurretik, gizonari 12 eta 9 urteko bi espetxe zigor ezarri zizkioten, 2019an eta 2020an Beasainen eta Lasarte-Orian bi sexu eraso egiteagatik.

Epaiketa hiru saiotan egingo dute: astelehenean, asteartean eta asteazkenean, hilaren 19tik 21era. Fiskaltzaren behin-behineko akusazioaren idazkiaren arabera, orain epaituko dituzten delituak 2012an gertatu ziren, sexu erasoko saialdien kasuan (abuztuaren 12an eta irailaren 23an), eta 2013an (bortxaketa, urte hartako irailaren 22an).

Fiskaltzak, hiru eraso horiengatik, guztira 28 urte eta hamar hileko kartzela-zigorrak eskatzen ditu. Akusazio partikularrak (Clara Campoamor Elkarteko Cristina Ramos abokatuak egingo du) 29 urteko espetxe-zigorra eskatzen du.

Orain arte, akusatuak beste bi aldiz epaitu dute, eta bederatzi eta 12 urteko kartzela-zigorrak ditu ezarrita, Lasarte-Orian 2020an eta Beasainen 2019an egindako bi sexu erasorengatik.

Gainera, beste sexu eraso bat du epaitzeko, instrukzio fasean.