Bermeon da jada Busturialdea urez hornituko duen itsasontzia

EITB MEDIA

Publikatuta: 2022/08/12 18:27 (UTC+2) Azken eguneratzea: 2022/09/21 12:25 (UTC+2)

Ontziak ibilbide bakoitzeko 4.000 m3 garraiatzeko gaitasuna izango du, eta ur hori Bermeora, Mundakara, Sukarrietara eta Busturiara helduko da urriaren erdialdera arte.

0:44

Whatsapp
Whatsapp
telegram
twitt
Bidali
Esteka kopiatu

Bideoak (1)

Busturialdea edateko urez hornituko duen itsasontzia iritsi da Bermeora

Bermeora iritsi da dagoeneko Bermeo, Mundaka, Sukarrieta eta Busturia herriak edateko urez hornituko dituen ontzia. Hasiera batean kostaldeko herrira datorren asteartean iristea aurreikusita zegoen.

EITB Mediak jakin ahal izan duenez, ontziak probak egin ditu ostiral honetan. Eskualdea hornitzen duten bideen egoera okerragotu egin da azken egunotan, gaur egungo larrialdi-egoera lehengoratzeko prezipitazio nahikorik egon ez izanagatik eta tenperatura altuko egun ugariengatik.

Itsasontziak ibilbide bakoitzeko 4.000 m3 garraiatzeko gaitasuna izango du, eta, aurreikusitakoaren arabera, urriaren erdialdera arte egongo da martxan. Gutxi gorabehera 2.000 m3-ko ekarpen garbia egingo du egunean; beraz, segundoko 23 litro hornituko ditu.

Ontzi horrek aurreko asteetan hartutako beste neurri batzuk sendotuko ditu; astelehen honetatik aurrera, ur zerbitzuaren presioa nabarmen murriztuko da gauean (00:00etatik 06:00etara) Busturialdean, ur horniduran aurrezpenak handitze aldera.

Arazoari behin betiko irtenbidea emateko, Busturialdeko sarea Zadorraren Sistemara lotzen duen azpiegitura bat eraikiko da, partzuergoaren 2022-2025 inbertsio-programan aurreikusitakoaren arabera. Dagoeneko, lizitatu egin da eraikuntza-proiektu horren azterlana.