Europako Batzordea tximino-baztangaren bilakaera "arreta handiz" jarraitzen ari da

Europako Batzordea tximino-baztanga Europar Batasunean izaten ari den bilakaera "arreta handiz" jarraitzen ari da; nahiz eta kontinentean ezohiko birusa eta transmisio gaitasun "moderatua" izan. Hala ere, zenbait agerraldi atzeman dituzte Espainia, Portugal eta Erresuma Batuan.

"Estatu kideekin harreman estua dugu, eta Osasun Segurtasunerako Batzordea aste honetan bildu da, eta hurrengo asteartean berriz batzartuko da", azaldu du Stefan Keersmaecker Osasun bozeramaileak Bruselan.

Agerraldiak "aztertzeko bilerak sarritan" egingo ditu batzordeak, gobernu, erakunde eta EBko agentzien artean "informazio-jario ona" ziurtatzeko. Bestalde, Munduko Osasun Erakundeak (MOE) premiazko bilera deitu du tximino-baztangaren bilakaeraren aurrean.

Carolina Darias Osasun ministroak ostiral honetan jakitera eman duenez, beste bi laginek positibo eman dute baztangan, bigarren analisian. Guztira, Espainiak 23 kasu baieztatu ditu dagoeneko, baina oraindik tximinorenak diren ala ez jakiteko sekuentziatu behar dituzte.

Portugalek ere bederatzi kasu berri baieztatu ditu azken orduetan. Horrela, 23 positibo zenbatu ditu jadanik, baina osasun agintariek gehiago izatea espero dute, laginen emaitzen zain baitaude.

Bestalde, Belgikak bi kasu atzeman ditu azken 24 orduetan, Marc Van Ranst birologoak iragarri duenez. Bigarren positiboa baieztatuz gero, kutsatua lehenengo gaixoaren harremana izango litzateke.

"Lovainako laborategian tximino-baztangaren bigarren kasua diagnostikatu dugu gauean", esan du Van Ranstek Twitter sare sozialean. Flandriako Brabante eskualdeko gizon baten lagina dela zehaztu du adituak.

Een tweede geval van het apenpokkenvirus werd vannacht gediagnosticeerd op ons labo in Leuven in een staal van een man uit Vlaams-Brabant.

Mensen die bij zichzelf letsels zoals op deze foto herkennen, kunnen best contact opnemen met hun arts. pic.twitter.com/ptGbQ9jAPf

— Marc Van Ranst (@vanranstmarc) May 20, 2022

Era berean, Frantziako Osasun Zuzendaritza Nagusiak positibo bat baieztatu du, 29 urteko gizonezko batena. Azken hilabeteetan bidaiarik egin ez duen pertsona da.

EBtik kanpo, Sajid Javid Erresuma Batuko Osasun ministroak 11 kasuren berri eman du. Guztira, 20 positibo zenbatu dituzte dagoeneko.

UKHSA have confirmed 11 new cases of Monkeypox in the UK.

This morning I updated G7 Health Ministers on what we know so far.

Most cases are mild, and I can confirm we have procured further doses of vaccines that are effective against Monkeypox. pic.twitter.com/T7ECf0E4AW

— Sajid Javid (@sajidjavid) May 20, 2022

Australian, tximino-baztanga atzeman dute 30 urteko gizon batean; duela gutxi Erresuma Batutik itzuli da, eta Melbournen, iragan astelehenean, lur hartu baino lehen sintoma arinak zituen.

Azkenik, Kanadako osasun buruzagiek tximino-baztangaren aurreneko bi kasuak baieztatu zituzten ostegun gauean, biak Montreal hirian. Hala ere, beste 20 kasu aztertzen ari direla erantsi dute.