Pablo Gonzalez, hilabete Poloniaren esku

Pablo Gonzalez kazetari euskal herritarrak hilabete egingo du Polonian preso astelehenean. Otsailaren 28an atxilotu zuten Poloniako kontraespioitza zerbitzuek, Ukrainako mugatik hurbil, gerrari eta errefuxiatuei buruz informatzeko lanean ari zenean, Errusiako Inteligentzia Zerbitzuko agente izatea egotzita.

Martxoaren 3an Rzeszów hiriko espetxean sartu zuten behin-behinean eta joan den asteazkenean jakin zen behin-behineko espetxealdian izango dela maiatzaren 29ra arte. Hala jakinarazi zion gutun bidez Poloniak Oihana Goiriena emazteari .

Poloniako Kode Penalaren 130.1 artikulua oinarri hartuta atxilotu zuten Gonzalez; errudun jotzen badute, 10 urte arteko espetxe zigorrari jaso dezake Gonzalezek. 

Hilabete pasa denean, ordea, ez bere abokatu Gonzalo Boyek, ez bere emazte zein senitartekoek, ez dute berarekin zuzenean hitz egiterik izan, baimena lortu nahian ari dira, baina, momentuz, gutunez baino ezin dira komunikatu.

Gaur gaurkoz, Varsovian dagoen kontsul espainiarrak soilik du baimena berarekin hitz egiteko. Haren bitartez jakin zuen familiak Gonzalez onik zegoela "animoz eta osasunez" eta irmo defendatu zuela bere errugabetasuna.

Boyek duela gutxi sareetan jakinarazi dutenez, ofiziozko abokatu bat jarri diote Gonzalezi, baina antza, Poloniako agintariek helarazitako datuekin ezinezkoa izan zaio abokatu harekin kontaktatzea.

Después de dos semanas detenido, las autoridades polacas dicen que le han designado defensa de oficio a @PabVis pero, "sorprendentemente", dicha defensa no es localizable en los datos de contacto que aportan las propias autoridades polacas... está pasando en un país de la UE

— Gonzalo Boye (@boye_g) March 16, 2022

Boyek egunotan salatu duenez, "Poloniako agintariak ez dira errespetatzen ari Pablo Gonzalezek Europar Batasuneko Oinarrizko Eskubideen Gutunean jasota dituen eskubideak", besteak beste "abokatu bat aurrean izan gabe galdekatzen" ari direlako kazetaria.

Pablo Gonzalez euskal jatorriko kazetaria Errusian jaio zen eta Nabarnizen bizi da, bere emaztearekin eta hiru seme-alabekin batera. La Sexta, Gara eta Público hedabideentzako ari zen lanean atxilotua izan zen boladan. Gonzalez aditua da Europako Ekialdeko herrialdeen historian eta politikagintzan. Inguru hartako gatazka ugari landu ditu, gainera, kazetari gisa.

Hilabete lehenagotik zelatatua

Atxilotua izan baino hilabete lehenago Ukrainako zerbitzu sekretuen deia jaso zuen Gonzalezek, Donbassen lanean zela, lehenbailehen Kievera joateko esanez, galdeketa bat egin behar ziotela eta. Publikok zabaldu zuenez, "errusiazaletzat" jo zuten galdeketa hartan eta, Poloniaren susmoa areagotu egin zuten antza, errusieraz jakiteak eta inguruak ondo ezagutzeak, bai eta Laboral Kutxako txartel bat izateak ere.

Hala, hiru eguneko epean Ukrainatik alde egitera "gonbidatu" zuten, kanporatze agindurik ezarri gabe, ordea.

Berria egunkariak jaso zuenez, artean Ukrainan zegoela, CNI Espainiako zerbitzu sekretuetako agenteak Gonzalezen senideen etxeetara joan ziren, Euskal Herrian eta Katalunian, Gonzalezen inguruko informazio eske.

Boyek, orduan, lehenbailehen etortzeko eskatu zion Gonzalezi, baina, hemen zegoela bakean utzi zuten: berriz hara itzuli zain egon ziren hura atxilo hartzeko, abokatuaren arabera.