Zubia: "Omikronek birusaren jokaera aldatu du, arinagoa da baina heriotza kopuru handiagoa eragin du"

Seigarren olatua "amore" ematen hasia dela ematen duen honetan, ospitaleetan "arinago" daudela baieztatu du Felix Zubia Donostiako Ospitaleko ZIUko zerbitzuburuak Euskadi Irratiko "Osasun Etxea" saioan. "Hiru hilabete gogor igaro ditugu, baina egoera arintzen" ari da, azaldu du, eta une honetan zer egin, "arlo guztien arteko oreka" nola lortu, Europa osoan ematen ari den eztabaida dela berretsi du, Omikronek orain arteko joko arauak aldatu baititu.

"Omikronek birusaren jokaera aldatu du. Kutsatzeak areagotu ditu baina arinagoa izan da, bera arinagoa delako eta txertaketari esker arinago pasatzea ekarri duelako, hein handi batean. Proportzioan, ospitaleetan eta ZIUetan gaixo gutxiago izan dira, baina kopuru orokorretan, hildako gehiago izan dira. 1.000tik 0,2ko hilgarritasuna du omikronek, aurrekoek baino gutxiago (1.000tik1 ) baina 10 aldiz gehiago kutsatu badu, azkenean, heriotza kopuru orokorra altuagoa da" hausnartu du medikuak.

Eusko Jaurlaritzako Osasun Sailaren txostenetan agertzen denez, 574 pertsona hil dira azken hiru hilabeteetan covid-19agatik Euskal Autonomia Erkidegoan (azaroaren 8ko txostenetik otsailaren 7kora arte), azken olatuetan baino gehiago.

"Zeintzuk ari dira hiltzen? Adinekoak eta immunitate arazoak dituztenak. Beraz, non dago oain eztabaida? Osasuna, ekonomia, normaltasunez bizitzeko gogoa, eskubideak.... guztien arteko oreka lortzea ez da erraza. Noizbait arindu behar dira neurriak baina noiz, orain, berandugo? Ez da erraza erantzuten. Dakiguna da trasmisioa areagotzen bada, zaurgarrienek ordainduko dutela".

Gauzak honela, eta datorren astetik aurrera, neurri gehienak arinduko direla jakinda, mezu argia eman die Zubiak kolektibo zaurgarrienei: "Babes daitezela".