Gizartea
KORONABIRUSA
Gabonetako ospakizunak hamar pertsonara eta bi familia unitatera mugatzea gomendatu du Eusko Jaurlaritzak
N. B. | EITB MEDIA
Hauek dira LABIren batzorde teknikoaren aholkuak Euskadin Gabonak ospatzeko. Jaurlaritzak zuhurrago jardutea gomendatzen du eta covid-19aren pandemiaren ondorioz EAE larrialdi egoeran dagoela gogorarazi du.
Albisteak (3)
Gabonetako ospakizunetan hamar pertsonara eta gehienez bi familia-unitatetara mugatutako talde "egonkor eta txikia" sortzea eskatu du Eusko Jaurlaritzak, baita horietan plater eta edalontzirik ez partekatzea ere, eta aerosolen emisioa areagotzen duten besarkadak eta ekintzak saihestea, bereziki espazio itxietan.
Gabonetan gizarte-harremanak ugarituko direla aurreikusten denez, Eusko Jaurlaritzako teknikariek herritarrei egiten dizkieten gomendioak bazkarietan eta afarietan zentratzen dira.
Gotzone Sagardui Osasun sailburuak LABIren batzorde teknikoak egun horietarako egindako gomendioen berri eman du Legebiltzarrean astelehenetan egindako agerraldian, Iñigo Urkullu lehendakariak iragarri bezala.
"Herritarrei dei egiten zaie nork bere burua mugatzeko eta nork bere burua arduraz jokatzeko, gaixotasuna hedatzeko arriskuak saihesteko neurriak betetze aldera", gomendioen dokumentuan jasotzen denez. Halaber, maskara, eskuen higienea, aireztapena eta pertsonen arteko distantzia erabiltzeko prebentzio-neurriak betetzeko beharra azpimarratzen da.
Bereziki gabonetan; izan ere, covid-19ak aurrera egitea eragiten duten egoerak izaten dira. Beraz, are zuhurrago jardutea gomendatzen dute eta covid-19aren pandemiaren ondorioz EAE larrialdi egoeran dagoela gogorarazi nahi dute.
Egun hauetako ekitaldi eta jardunaldiak direla eta, hala nola azokak eta azoka txikiak, ekitaldi erlijiosoak, kabalgatak eta desfileak, kotilioiak eta gabonetako antzeko beste jaiak. Printzipio orokor gisa, erakunde antolatzaile publiko eta pribatuei eskatzen zaie ez dezatela antolatu, sustatu edo parte hartu bete beharreko gutxieneko segurtasun- eta prebentzio-neurriak bete ezin diren ekitaldi kolektiboetan. Era berean, enpresako afariak edo bazkariak ez antolatzea gomendatzen da.
Herritarrei gomendatzen zaie zuhurtziaz jokatzeko gabonetako ekitaldietan, itxarote-ilaretan, inguruetan eta jendetza mugitzen den lekuetan, tren-eta autobus-geltokien espazioetan eta aireportuetan. Era berean, zalaparta handiko lekuak dira ikastetxeak, ikasleen sarrera- eta irteera-uneetan; gurtza-lekuak; merkataritza-guneak, eta kale komertzialak eta hiriguneak, jendetza batzen den egun hauetan.
Ostalaritzako establezimenduetako kontsumoa dela eta, komeni da modu antolatuan kontsumitzea mahaietan (sei pertsona), barran baino hobeto, eta talde txikietan, eta, ahal dela, kanpoan.
Neurri horiek Gabon-gauetik hiru egunera argitaratu dira, eta, une honetan, eguneko positiboak 1.607ra igo dira. Kutsatze-tasa % 11,5ekoa da, eta 14 eguneko intzidentzia metatua igande honetan 1.179,15ekoa da. Ospitaleetako gela arruntetan 324 pertsonak dute covid-a eta 105 ZIUetan daude; azken astean 38 pertsona hil dira koronabirusarekin.
Sagarduik azpimarratu duenez, "pandemiak ez du inolako hobekuntzarik izan, kutsatze-mailak izugarri igo dira, ospitaleetarako zirkulazioa gero eta handiagoa da eta ez da ikusten epe laburrean joera aldatuko denik".
Iñigo Urkullu lehendakariak uste du "premiazkoa" dela maskara derrigorrezkoa izatea kanpoaldean, prebentzio-neurriak harmonizatzea eta babes juridikoa bermatzea, covid-19aren pandemiaren seigarren olatuari aurre egiteko. Presidenteen Konferentziaren hurrengo bilerari begira (hilaren 22an egingo da), "diagnostiko bat partekatzeko eta neurri komunak aztertzeko" eskatu du, "ez baita positiboa erantzun eta erabaki desberdinen arteko desberdintasuna".
