Gizartea
Koronabirusa
Bizkaiko ostalariak, covid ziurtagiriari buruz: "Badira neurri kaltegarriagoak, hau ez da hain txarra"
Eider Garaikoetxea O. | EITB MEDIA
Hector Sanchez Bizkaiko Ostalarien Elkarteko gerenteak Euskadi Irratian salatu duenez, beste behin "polizia lana" egokitu zaie. "Pandemia guztian zehar ibili gara horretan", erantsi du.
-
Ostalari bat bere establezimenduan covid ziurtagiriaren kartel bat jartzen, Valentzian. EFE
Hector Sanchez Bizkaiko Ostalarien Elkarteko gerentea etsita agertu da aurki jatetxe handi eta gaueko aisialdian covid ziurtagiria eskatu beharko dutela eta, baina onartu du badirela "neurri kaltegarriagoak". "Hau ez da hain txarra", nabarmendu du.
Auzitegi Gorenak oniritzia eman dio Jaurlaritzari 50 mahaikide baino gehiagoko jatetxeetan eta dantzalekuetan osasun ziurtagiria eskatu ahal izateko. Litekeena da larunbatean bertan sartzea indarrean.
Sanchezek Euskadi Irratian egin dioten elkarrizketa batean adierazi duenez, ostalariak etsita daude: "Sektoreak ez dauka aukerarik, nahiago genuke neurririk ez egotea, baina oraingo honetan ulertzen dugu bete behar dugula".
"Pandemia osoan zehar 'polizia lanak' egiten ibili gara, aurrena maskararekin eta orain ziurtagiriarekin", kritikatu du.
Azaldu duenez, gaueko aisialdiarentzat ez du horrenbesteko aldaketarik ekarriko, izan ere, "eurek badituzte langileak sarbidea kontrolatzeko, bezeroak adinez nagusiak direla egiaztatzeko, adibidez". Jatetxe handientzat, ordea, "lan gehiago izango da, baina espero dugu langile gehiago kontratatu behar ez izatea".
Sanchezek argitu du elkarteak APP bat jarri duela ostalarien esku, Suitzako Osasun Zerbitzu Publikoak garatutakoa. "Oso erraza da, azkarra", nabarmendu du, eta gaineratu bezeroari nortasun agiria edo tankerako dokumentu bat eskatu beharko zaiola bera den egiaztatzeko.
"Neurri berriak beti dira zailak, baina, tira, espero dugu pixkanaka-pixkanaka normalizatzen joatea", esan du.
